"Changan Mazda", 21-ci Şanxay Avtomobil Sərgisində avtomobil dünyasının diqqətini çəkə bildi. Yapon istehsalçının çinli ortağı ilə birlikdə inkişaf etdirdiyi tamamilə yeni elektrikli "crossover SUV" modeli "Mazda EZ-60", sərginin iddialı yenilikləri arasında yer alıb.
HİT.az xəbər verir ki, 2025-ci ildə yalnız Çin bazarına təqdim olunacaq "EZ-60", "Mazda"nın bu böyük bazardakı elektrikli avtomobil strategiyasının vacib bir parçası olacaq. İlk baxışda müasir və dinamik xətləri ilə seçilən bu yeni model, texnoloji xüsusiyyətləri ilə də öz seqmentində iddialı mövqeyə gəlməyə hazırlaşır.
"Changan Mazda"nın verdiyi məlumata görə, "EZ-60" yalnız elektrikli bir avtomobil olmaqla kifayətlənmir. Avtomobil, səs, toxunma və hətta jestlərlə idarə oluna bilən ağıllı kabin sisteminə malikdir. Sürücü təhlükəsizliyini maksimuma çatdırmaq məqsədi daşıyan ağıllı sürüş dəstək sistemləri də "EZ-60"ın əsas xüsusiyyətləri sırasındadır. Bundan əlavə, sürücülərin parklanma manevrlərini asanlaşdırmaq üçün avtomobilin xaricindən səsli əmrlərlə idarə oluna bilən ağıllı park köməkçisi funksiyası da təqdim olunur.
"Mazda" "EZ-60" modelini ekoloji yanaşma ilə iki fərqli güc ötürmə sistemi ilə təqdim edəcək: tamamilə elektrikli (BEV) və şarj edilə bilən hibrid (PHEV). Bu strategiya fərqli istifadəçi seçimlərinə və istifadə ssenarilərinə cavab verməyi hədəfləyir.
Elektrikli avtomobil alıcılarının ən çox maraqlandığı mövzulardan biri olan yürüş məsafəsi baxımından "EZ-60" iddialı rəqəmlərə sahibdir. Tamamilə elektrikli versiyanın təxminən 600 kilometrlik bir sürüş məsafəsi təqdim etməsi gözlənilir. Şarj edilə bilən hibrid versiyada isə benzinli mühərrikin dəstəyi ilə birləşmiş yürüş məsafəsinin 1000 kilometrdən çox olacağı proqnozlaşdırılır.
"EZ-60", 2.902 mm təkər bazası ilə birlikdə 4.850 mm uzunluğa, 1.935 mm enə və 1.620 mm hündürlüyə sahibdir. Bu ölçülər həm geniş bir salon sahəsi, həm də dinamik sürüş təcrübəsi vəd edir. Təhlükəsizlik baxımından isə "Mazda", "EZ-60"da standart olaraq doqquz hava yastığı təqdim edir. Bundan əlavə, beş yüksək çözünürlüklü kamera, beş millimetr dalğa radarı və on iki ultrasəs sensoru ilə dəstəklənən geniş sürücü dəstək sistemi də avtomobildə mövcuddur.
"Changan Mazda"nın "EZ-60" modelini avqust ayında Çin bazarında satışa çıxarması planlaşdırılır. İlkin rəylər bu yeni elektrikli "crossover SUV"un "Mazda"nın Çinin olduqca rəqabətli elektrikli avtomobil bazarında yenidən mühüm oyunçu olmasına kömək edə biləcəyini göstərir. Avtomobil həvəskarlarının maraqla gözlədiyi başqa bir sual isə "EZ-60"ın gələcəkdə qlobal bazarlarda da təqdim olunub-olunmayacağıdır. Hazırda bu barədə rəsmi açıqlama verilməyib, lakin "EZ-60"ın Çində əldə edəcəyi uğur bu ehtimalı formalaşdıracaq əsas amillərdən biri olacaq.
Samir
