Krossoverlər yeni avtomobillərin satış reytinqlərində üstünlük təşkil etsə də, onların çox az hissəsi həqiqi yolsuzluq avtomobilləridir. Yüksək yer təmizliyinə baxmayaraq, bu modellər daha çox şəhər sürüşü üçün uyğundur və dik dağa qalxmaq və ya çayın o biri sahilinə keçmək üçün nəzərdə tutulmayıb.

Əgər siz vəhşi təbiətə yollanmaq istəyirsinizsə, o zaman sizə tamhüquqlu yolsuzluq avtomobili lazımdır – digər avtomobillərin gedə bilmədiyi nöqtələrə çatdıracaq güclü nəqliyyat vasitəsi.

Hit.az xəbər verir ki, bu gün bazar çox geniş yolsuzluq avtomobili seçimi təklif edir. Seçim etmək bəzən çətin olur, buna görə də "Autocar" potensial alıcılara kömək məqsədi ilə ən yaxşı variantı açıqlayıb.

Nəşr öz reytinqində yolsuzluq avtomobilləri və tam ötürücülü modellər arasında ilk yerə "Land Rover Defender Octa" modelini yerləşdirib.

“Dünyanın ən universal avtomobillərinin siyahısını tərtib etsəniz, "Defender" mütləq ilk üçlükdə olacaq”, deyə avtomobil eksperti Met Sonders bildirib.

Mütəxəssislərin sözlərinə görə, "Land Rover Defender Octa" əla dinamika, artırılmış keçid qabiliyyəti və qabaqcıl təhlükəsizlik texnologiyaları ilə seçilir. Avtomobil palçıq, su keçidləri və enişli sahələrdə sürüş üçün ideal olmaqla yanaşı, yolda da özünü çox rahat göstərir və geniş, keyfiyyətli interyerə malikdir.

Modelin müəyyən şərti çatışmazlıqları da var. Məsələn, bu avtomobili büdcəli adlandırmaq çətindir. 

Mütəxəssislər diqqətəlayiq digər yolsuzluq avtomobillərini də qeyd ediblər. Onların arasında "Jeep Wrangler" və "Toyota Land Cruiser" yer alır. Birinci model standart komplektasiyada zəngin təchizatına görə, ikinci isə yüksək etibarlılığı ilə fərqlənir.

2025-ci ilin ən yaxşı 10 yolsuzluq və tam ötürücülü avtomobili:

1."Land Rover Defender Octa"
2."Jeep Wrangler"
3."Toyota Land Cruiser"
4."Ford Ranger Raptor"
5."Range Rover"
6."Mercedes-Benz G-Class"
7."Subaru Outback"
8."Dacia Duster 4x4"
9."Land Rover Discovery"
10."Ineos Grenadier"

Samir