Asfalt üzərində görməyə alışdığımız klassik ağ və sarı xətlər qəfil narıncı rənglə əvəzlənəndə sürücülər təəccübünü gizlədə bilməyib. Xüsusilə San-Dieqo ətrafındakı avtomagistrallarda müşahidə edilən bu yenilik sadəcə dizayn seçimi deyil, həyat xilas etməyə yönəlmiş təhlükəsizlik təşəbbüsüdür.

HİT.az xəbər verir ki, "Caltrans" və "SANDAG" əməkdaşlığı ilə başladılan pilot layihə sürücülərə birbaşa şəkildə “Diqqət, tikinti zonasına daxil olursan” mesajını çatdırmağı hədəfləyir. İş aparılan ərazilərdə tətbiq olunan müvəqqəti narıncı zolaqlar qaydaların dəyişdiyi təhlükəli döngələrdə sürücüləri aydın şəkildə istiqamətləndirir. Gecə sürüşü zamanı ənənəvi xətlərlə müqayisədə daha yüksək görünürlük təmin edən bu üsul yolun harada daraldığını və ya zolaqların hansı istiqamətə keçdiyini yol nişanlarından daha tez anlamağa imkan verir.

Sürücülər bu rənglərin texniki xüsusiyyətlərini bilməsələr də, yol konuslarından tanış olan “xəbərdarlıq” hissi instinktiv olaraq sürəti azaltmağa səbəb olur. Vizual aydınlıq həm yol işçiləri, həm də sürücülər üçün daha təhlükəsiz mühit yaradır.

Kaliforniya bu sahədə ilk deyil. Bu sistem təxminən on il əvvəl qarlı yollarda zolaq nişanlarını itirən Viskonsin ştatında tətbiq olunmağa başlayıb. Müsbət nəticələrdən sonra Kentukki, Texas və Miçiqan kimi ştatlar da bu təcrübəyə qoşulub. Kanada və Yeni Zelandiya da narıncı zolaqların effektivliyini sınaqdan keçirir. Mütəxəssislər hesab edir ki, bu cür aydın nişanlama sistemi yol nişanlarını bəzən çətin qəbul edən avtonom nəqliyyat vasitələri üçün də gələcəkdə böyük üstünlük yaradacaq.

Yol tikintisi zonalarında qəzalar hələ də ciddi problem olaraq qalır. Lakin statistika ümidvericidir. "Purdue University" tərəfindən aparılan araşdırmalar göstərir ki, narıncı zolaqların tətbiq edildiyi yollarda zolaqdan çıxma nəticəsində baş verən qəzalar 74 faiz azalıb. Tətbiq sürücülərin əksəriyyəti tərəfindən müsbət qarşılanıb və yalnız qəza sayını azaltmaqla kifayətlənməyib, həm də tikinti zonalarında orta sürətin nəzərəçarpacaq dərəcədə aşağı düşməsinə səbəb olub.

San-Dieqoda başlayan sınaq mərhələsinin yaxın zamanda bütün avtomagistral tikintilərində standart praktikaya çevriləcəyi istisna edilmir.

Samir