Ukrayna Təhlükəsizlik Xidməti azərbaycanlı “oğru” Nadir Səlifovun (Lotu Quli) nüfuz dairəsinə daxil olan kriminal elementləri həbs edib. 

HİT.Az yenisabah.az-a istinadən xəbər verir ki, əməliyyat Odessa şəhərində keçirilib. Nadir Səlifova yaxın olan 2 nəfər özəl sektorlardan birində həbs edilib. Bildirilir ki, saxlanılan şəxslər şəhərdə sahibkarları qorxu altında saxlayırmış.  

Odessada Nadir Səlifovun tərəfdarlarına qarşı bundan əvvəl də əməliyyat keçirilib. İyul ayında keçirilən əməliyyat nəticəsində 10 nəfər saxlanılmışdı.  Ukrayna Milli Təhlükəsizlik Xidmətinin yaydığı məlumatda bildirilir ki, Odessa şəhərində vətəndaşları və bölgənin sahibkarlarını sıxışdıran cinayətkar beynəlxaq dəstənin üzvləri müəyyən edilib: "Onlar iyulun 7-də günorta saatlarında yerli sahibkarlardan birini oğurlamaq iniyyətində olublar. Hadisədən əvvəlcədən xəbərdar olan Ukrayna təhlükəsizlik orqanlarının əməkdaşları dəstənin üzvlərini zərərsizləşdirib. Kriminal dəstənin 10 nəfər üzvü olub. Onlar süni şəkildə münaqişə yaradaraq, sahibkarlardan külli miqdarda pul tələb ediblər və ödəmədikləri təqdirdə sahibkarları zorakılıqla hədələyiblər. Məlum olub ki, dəstə üzvlərini Ukrayna tərəfindən axtarışda olan "Lotu Quli" ləqəbli şəxs idarə edir. Əməliyyat-axtarış tədbirləri nəticəsində saxlanılan şəxslərin yaaşdıqları yerdə iş üçün əhəmiyyət kəsb edən maddi sübutlar götürülüb".

Lotu Quli hazırda postsovet məkanında ən nüfuzlu “oğru”lardan biri hesab edilir. O azadlığa buraxılandan sonra qısa müddət ərzində Rusiya, Ukrayna, Türkiyə və digər ölkələrdə kifayət qədər güclü şəbəkə qurub.