Prezident Volodimir Zelenski Haaqada Niderlandın baş naziri Mark Rutte və Belçikanın baş naziri Aleksandr de Kroo ilə birgə mətbuat konfransında deyib ki, Ukraynanın Rusiyanın başlatdığı müharibənin yaratdığı dağıntıları bərpa etmək üçün 400 milyard dollardan çox vəsait lazımdır.

HİT.az "Unian"a istinadən xəbər verir ki, Zelenski rusların enerji stansiyalarını, təhsil müəssisələri şəbəkəsini, mədəniyyət mərkəzlərini və muzeyləri, kilsələri və müxtəlif infrastruktur obyektlərini dağıdıtdığını xatırladıb. Ukrayna prezidenti qeyd edib ki, Rusiyanın dondurulmuş aktivlərinin müsadirə edilməsi və Ukraynanın bərpası üçün istifadə edilməsi ilə bağlı digər ölkələrin mövcud qanunvericiliyində hələ də problem var.

Belçika dondurulmuş Rusiya aktivlərindən 58 milyard avro məbləği Ukraynaya köçürmək niyyətində olduğunu açıqlayıb. Lakin Zelenski qeyd edib ki, bu vəsait bərpa etmək üçün kifayət deyil.

"Çünki, hətta Dünya Bankının son hesablamalarına görə, bizə 400 milyarddan çox vəsait lazımdır. Bunlar real statistikadır. Amma biz müvəqqəti olaraq işğal olunmuş ərazilərdə nə baş verdiyini, orada dağıntıların hansı səviyyədə olduğunu bilmirik", deyə Zelenski bildirib.

O əlavə edib ki, Ukrayna müttəfiq ölkələr və Avropa Komissiyasından Rusiyanın dondurulmuş aktivlərinin Ukraynaya ötürülməsinə imkan verəcək mexanizm tapmağı xahiş edir.

Samir