İyunun 23-də Yaponiya hakimiyyəti Oz virusundan dünyada ilk ölüm faktını açıqlayıb.

HİT.az xəbər verir ki, bu barədə “Kyodo News” məlumat yayıb.

Tokionun şimal-şərqindəki İbaraki prefekturasının səlahiyyətlilərinin və Yaponiya Səhiyyə Nazirliyinin məlumatına görə, 70 yaşlarında bir qadın Oz virusuna yoluxduqdan sonra dünyasını dəyişib və bu yoluxma ehtimalı ilə dünyada ilk ölüm hadisəsi olub.

Həkimlər ona pnevmoniya diaqnozu qoyublar, lakin xəstənin vəziyyəti pisləşdikdən sonra xəstəxanaya yerləşdirilib, bu zaman onun sağ budunda gənə aşkarlanıb. O, xəstəxanaya yerləşdirildikdən 26 gün sonra ürək əzələsinin iltihabı olan miokarditdən vəfat edib. 

Tokiodakı Milli Yoluxucu Xəstəliklər İnstitutunun məlumatına görə, hazırda Yaponiyada Oz virusuna qarşı peyvənd yoxdur. İnstitut bildirib ki, virusa yoluxmaq mütləq ölümcül deyil, lakin onun simptomları və təhlükələri ilə bağlı daha çox araşdırma aparılmalıdır. İnstitutun bildirdiyinə görə, Oz virusunun gənə dişləməsi ilə ötürüldüyü düşünülür.

Virus ölkədə 2018-ci ildə Qərbi Ehime prefekturasında aşkar edilib, insanlarda və vəhşi heyvanlarda yoluxma halları ehtimal olunsa da, indiyədək onun insanda aşkarlanması təsdiqlənməmişdi.

Tokio yaxınlığındakı Çiba, mərkəzi Qifu və Mie, qərbdəki Vakayama və Yamaquçi, cənub-qərbdəki Oita  prefekturalarında vəhşi meymun, qaban və marallarda antikorlar aşkar edilib.

Milli Yoluxucu Xəstəliklər İnstitutundan verilən məlumata görə, Yamaquçidəki iki ovçunun da antikor üçün testinin nəticəsi müsbət olub. Səhiyyə Nazirliyinin rəsmisi “Otlu ərazilərə girərkən bu gənələrin sizi dişləməməsi üçün mümkün qədər dərini örtmək vacibdir” deyib.

Samir