Amerikalı maliyyəçi və investor Corc Soros tərəfindən yaradılmış xeyriyyə fondları, təşkilatlar və proqramlar şəbəkəsi olan “Open Society Foundations” yaxın aylarda bütün dünya üzrə işçilərini ən azı 40% ixtisar edəcək.

Publika.az xəbər verir ki, bu barədə “Bloomberg” məlumat yayıb.

İyun ayında “The Wall Street Journal” 92 yaşlı Sorosun 25 milyard dollarlıq təməl imperiyasını oğluna təhvil verdiyini yazmışdı.

Nəşr bildirir ki, dekabrda Açıq Cəmiyyətin direktorlar şurası onun 37 yaşlı oğlu Aleksandrı prezident seçib və gənc iş adamı bu vəzifədə atasını əvəzləyib. O, həm də Sorosun siyasi fəaliyyət komitəsinin sədridir.

Agentliyin məlumatına görə, fondun idarə heyəti onun fəaliyyət modelində "əhəmiyyətli dəyişiklikləri" təsdiqləyib. Bunlara ixtisarlar daxildir. 2021-ci ilin sonuna olan məlumata görə, Açıq Cəmiyyətdə 500-dən çox işçi çalışıb.

“Bloomberg” qeyd edir ki, Aleksandr Soros və fondun prezidenti Mark Mellok-Braunun fikrincə, təşkilatın daha çevik olması üçün dəyişikliklərə ehtiyac var.