Rusiya prezidenti Vladimir Putinin 2022-ci ilin yanvarında Almaniyadan Kalininqrada təxliyə edilən “Greysful” adlı yaxtası ilə bağlı yeni araşdırma ortaya çıxıb.

Musavat.com xarici agentliklərə istinadən xəbər verir ki, bu barədə Aleksey Navalnının komandası xüsusi material hazırlayıb.

Uzunluğu 82 metr olan yaxtanın dəyəri 100 milyon dollardır. Təkcə 2022-ci ildə təmir və texniki xidmət üçün ona 3 milyard rubl (təxminən 32 milyon dollar) xərclənib.

Son vaxtlara qədər yaxta ofşor şirkətinin adında qeydiyyatda olub. Həmin şirkətin son benefisiarı Putinin uşaqlıq dostu Pyotr Kolbindir. Qeyd olunur ki, Rusiyanın Federal Mühafizə Xidmətinin əməkdaşları Putinin digər yaxtası olan “Şəhrizad”ı da eyni sxemlə ölkəyə gətirə biliblər.

“Greysful” Arkadi Rotenberq, habelə Estoniya, İtaliya, Türkiyə və Almaniya şirkətləri vasitəsilə sanksiyalardan yayına bilib.

Yaxta üçün təkcə bu il:

• 6 milyon rubl dəyərində xalçalar,
• "çimərlik və dəniz istirahətinin təşkili üçün xüsusi hovuz - 208 mln rubl.
• 500 min rublluq nərd oyun taxtası,
• 1,2 milyon rubla zirehli çətirlər və s. alınıb.