Çinin yüksək təhlükəsizlik agentliyi eyham edib ki, bu il San-Fransiskoda prezident Si Szinpin və ABŞ prezidenti Co Bayden arasında istənilən görüş "Vaşinqtonun kifayət qədər səmimiyyət nümayiş etdirməsindən” asılı olacaq.

HİT.az "Reuters"ə istinadən xəbər verir ki, Bayden bazar günü Si Szinpinin Hindistanda keçiriləcək G20 liderlərinin sammitində iştirak etməyəcəyindən məyus olduğunu bildirib. Lakin əlavə edib ki, "onu mütləq görəcək".

Bayden dəqiqləşdirməyib, amma iki ölkə çətin münasibətlərini sabitləşdirməyə çalışdığı üçün Si ilə danışıqlar aparmağa növbəti mümkün fürsət noyabrda San-Fransiskoda keçiriləcək Asiya-Sakit Okean İqtisadi Əməkdaşlıq sammitidir.

“Balidən San-Fransiskoya” ideyasını həqiqətən həyata keçirmək üçün Birləşmiş Ştatlar kifayət qədər səmimiyyət nümayiş etdirməlidir”, deyə Çin Dövlət Təhlükəsizlik Nazirliyinin bəyanatında bildirilir.

Söhbət ötən ilin noyabrında İndoneziyanın Bali adasında keçirilən G20 sammiti çərçivəsində Bayden və Si Szinpin arasında son görüşdən gedir. Nazirlik San-Fransiskoda keçiriləcək Asiya-Sakit Okean İqtisadi Əməkdaşlıq sammitindən bəhs etməyib.

Çinin ən yüksək kəşfiyyat orqanı olan nazirliyin Si Szinpinin diplomatik öhdəliklərlə bağlı düşüncələrindən xəbərdar olub-olmaması aydın deyil.

Baş nazir Li Qianq bu həftə sonu Yeni Dehlidə keçiriləcək G20 sammitində nümayəndə heyətinə başçılıq edəcək, Çin hökuməti Si Szinpinin tədbirdə iştirak etməyəcəyini təsdiqləyib.

Samir