Fransa prezidenti Emmanuel Makronun Ukraynaya qoşun göndərilməsi ilə bağlı açıqlamasının məqsədi Rusiyaya güclü strateji siqnal vermək olub.
HİT.az "Politico"ya istinadən xəbər verir ki, Fransa rəsmiləri Makronun sözlərini belə əsaslandırırlar.
Qəzetin mənbəsi qeyd edir ki, Makronun şərhləri Qərb güclərini hərəkətə gətirmək və Rusiya Federasiyasının qələbəsinin qarşısını almaq üçün nə etmək lazım olduğuna dair debatları alovlandırmaq məqsədi daşıyırdı.
"Makronun sözləri Rusiyaya güclü mesaj göndərmək məqsədi daşıyırdı", deyə Yelisey Sarayının rəsmisi bildirib.
"Politico" vurğulayır ki, əgər Fransa prezidentinin açıqlamaları Moskvaya qəti xəbərdarlıq etmək məqsədi daşıyırdısa, o, tamamilə uğursuzluqla nəticələndi və tamamilə əks effekt əldə etdi - Ukraynadakı vəziyyətlə bağlı Qərbdə parçalanma və fikir ayrılığını təsdiqləyir.
"Politico" həmçinin Fransa rəsmilərinə istinadən yazıb ki, Fransa prezidenti Emmanuel Makronun NATO qoşunlarının Ukraynaya göndərilməsi ilə bağlı bəyanatı Kiyevə ziyan vurub.
Fevralın 26-da Fransa prezidenti Emmanuel Makron Qərb qoşunlarının Ukraynaya göndərilə biləcəyini etiraf edib. Bu ideyadan imtina demək olar ki, dərhal Polşa və İsveç, həmçinin ABŞ, Almaniya, Slovakiya və Macarıstan tərəfindən səsləndirilib.
NATO-nun Baş katibi Yens Stoltenberq bu məsələnin müzakirəsini təsdiqləməyib. Buna baxmayaraq, Estoniyanın baş naziri Kaya Kallas Ukraynaya qoşun göndərilməsi ilə bağlı müzakirələri dəstəkləyib. Kreml bu mövzunun müzakirəsini təhlükəli hesab edir.
Fevralın 27-də Yelisey sarayı prezidentin sözlərinə aydınlıq gətirən bəyanat yayıb. Fransa hökumətinin mesajında deyilirdi ki, söhbət döyüş qüvvələri haqqında deyil, Ukraynaya kömək edə biləcək istehkamçılar, təlimatçılar və ya xidmət personalından gedir.
Rusiya prezidenti Vladimir Putin fevralın 29-da Federal Məclisdə çıxışı zamanı bildirib ki, Qərb belə bir addım atmağa qərar verərsə, nəticələri onun üçün faciəli olacaq. "Qərbin ortaya atdığı hər şey həqiqətən nüvə silahından istifadə ilə münaqişə və buna görə də sivilizasiyanın məhvi ilə təhdid edir", deyə Putin bildirib.
Samir
