"Rusiya-Ukrayna müharibəsi davam etdikcə, ABŞ Rusiyanın sərhədlərinə doğru irəliləyir".

Bu sözləri Hit.az-a açıqlama verən politoloq Rüstəm Tağızadə deyib. 

O bildirib ki, bu irəliləmə ərazi cəhətdən deyil, NATO nöqteyi-nəzərindən başa düşülməlidir:

"ABŞ Dövlət katibi Antoni Blinken Ukraynanın NATO-ya üzv olacağını deyir. Amma bu, müharibənin davam edəcəyi və Rusiyaya qarşı təzyiqin artılacağı mənasına gəlir. NATO Rusiyanın sərhədlərinə yaxınlaşdıqca mübarizə daha da mürəkkəb xarakterə sahib olur".

Politoloq qeyd edib ki, Ukrayna son vaxtlar ABŞ-dən gələn hərbi yardımlardan narazıdır:

"Bu, başa düşüləndir. Nəzərə almaq lazımdır ki, ABŞ-də keçiriləcək Prezident seçkiləri yaxınlaşır. Bundan əlavə, Rusiyanın hücumları intensiv xarakter daşımağa başlayıb. Ukrayna isə dronlar vasitəsilə Rusiyanın şəhərlərində yerləşən neft sənayesi zavodlarına zərbə vurur".

Onun sözlərinə görə, indiki dron hücumları dalğası belə Rusiya sənayesi və iqtisadiyyatına məhdud təsir göstərəcək:

"Dron hücumları bütün neftayırma zavodlarını məhv etmir. Hətta ayrı-ayrı bölmələri də məhv etmir, sadəcə olaraq onlara zərər verir. 

Belə ki, Ust-Luqa və Ryazan neftayırma zavodları hücuma məruz qaldıqdan bir neçə həftə sonra yenidən fəaliyyətə başlayıb. Rusiya neft emalı zavodlarına qarşı tətillər Rusiya neft şirkətləri üçün maliyyə itkiləri yaradır, lakin dövlət büdcəsinə zərər vermir və Rusiyanın ixrac gəlirlərinə az təsir edir. 

Rusiya silahlı qüvvələrinin ehtiyacları və Rusiya iqtisadiyyatının yanacağa olan əsas ehtiyacları Ukrayna pilotsuz təyyarələrinin əli çatmayan zavodlar tərəfindən ödənilə bilər". 

Rüstəm Tağızadə söhbət zamanı Ukrayna Prezidenti Volodimir Zelenskinin ABŞ Konqresinin Moskvanın işğalı ilə mübarizə üçün hərbi yardımı təsdiqləməsə, Rusiyaya qarşı müharibəni uduzacağını deməsini də xatırladıb:

"Konqresdəki respublikaçılar aylardır ki, Kiyevə ayrılan on milyardlarla dollarlıq hərbi yardımın qarşısını alırlar. Bu baxımdan, təzadlarla dolu olan bu müharibədə nə Ukrayna, nə də Rusiya qalib gələ bilməyəcək. Hazırkı məqamda Rusiya əsasən Odessa şəhərinə hücumları davam etdirəcəyini düşünürəm".

Pərviz