Almaniya və digər Qərb ölkələri Ukrayna səmasında Rusiya raket və pilotsuz təyyarələrinin vurulması imkanlarını ciddi müzakirə etmir. 

HİT.az xəbər verir ki, bunu Almaniyanın müdafiə naziri Boris Pistorius deyib.

O qeyd edib ki, bu, münaqişədə birbaşa iştirak olacaq.

"Bu, çox həssas tələbdir. Bu, müharibədə bilavasitə iştirakın bir forması olardı. Ona görə deyərdim ki, gəlin bunu müzakirə edək, amma indi vaxt deyil və bizim bunu ciddi nəzərdən keçirmək imkanımız yoxdur", deyə Pistorius bildirib.

Qeyd edək ki, Rusiya daha əvvəl Ukraynaya silah tədarükü ilə bağlı NATO ölkələrinə nota göndərmişdi. Rusiyanın xarici işlər naziri Sergey Lavrov qeyd edib ki, Ukrayna üçün silah olan istənilən yük Rusiya üçün qanuni hədəfə çevriləcək. Rusiya Xarici İşlər Nazirliyi bəyan edib ki, NATO ölkələri Ukraynaya silah verməklə "odla oynayır". 

Rusiya prezidentinin mətbuat katibi Dmitri Peskov qeyd edib ki, Ukraynanı Qərbdən silahlarla doldurmaq Rusiya-Ukrayna danışıqlarının uğuruna kömək etmir və mənfi təsir göstərəcək. Lavrov ABŞ və NATO-nun Ukraynadakı münaqişədə birbaşa iştirak etdiyini, o cümlədən təkcə silah tədarükü ilə deyil, həm də Böyük Britaniya, Almaniya, İtaliya və digər ölkələrdə kadrların hazırlanması ilə məşğul olduğunu bildirib.

Samir