ABŞ prezidenti Co Bayden və prezidentliyə namizəd Donald Tramp arasında iyunun 28-də teledebat Rusiya prezidenti Vladimir Putinin gündəmindəki əsas məsələlərdən deyil.

HİT.az xəbər verir ki, bunu onun mətbuat katibi Dmitri Peskov bildirib. 

Onun sözlərinə görə, Kreml bu mövzuda mətbuatda gedən xəbərlərlə tanış olacaq, lakin bunu ABŞ-ın daxili işi hesab edir.

"Düşünmürəm ki, siz Rusiya prezidentinin zəngli saat qura, səhər oyanıb ABŞ-dakı debatlara baxdığına inanırsınız. Yenə də bu, gündəmimizdə olan bir hadisə deyil. Bizim ölkəmiz üçün həqiqətən vacib olan və bizim üçün aktual olan bir çox məsələmiz var", deyə Peskov bildirib.

Kremlin debata ilkin qiymət verməyə hazır olub-olmaması ilə bağlı suala Dmitri Peskov mənfi cavab verib:

"Biz heç vaxt ABŞ-ın seçki kampaniyalarına müdaxilə etməmişik. Yadınızdadırsa, ABŞ-da bir neçə dəfə araşdırmalar aparılıb. Orada çoxları Rusiyanı günahlandırdı, bahalı kampaniyalar apardılar və heç bir müdaxilənin qeydə alınmadığı qənaətinə gəldilər. Bu dəfə də bunu etməyəcəyik".

Bu gün, iyunun 28-də CNN telekanalında Donald Tramp və Co Bayden arasında seçki yarışının teledebatının birinci mərhələsi baş tutub. Onlar həmçinin Ukraynadakı döyüşləri, Vladimir Putinin irəli sürdüyü sülh danışıqlarının başlanması üçün şərtləri, münaqişənin NATO ölkələri və Belarusiyaya genişlənməsi təhlükəsini qeyd ediblər. 90 dəqiqə ərzində hər biri yeddi dəfə Vladimir Putinin adını çəkiblər. Co Bayden debat zamanı Putini “müharibə cinayətkarı” adlandırıb.

Samir