Danimarka hökuməti baş nazir Viktor Orbanın Rusiya və Çinə son səfərlərindən sonra etiraz olaraq bu ay Macarıstanın Avropa İttifaqı Şurasına sədrliyi çərçivəsində nazirləri qeyri-rəsmi görüşlərə göndərməyəcək.

HİT.az “Reuters”ə istinadən xəbər verir ki, bu barədə Danimarka Xarici İşlər Nazirliyinin rəhbəri Lars Lok Rasmussenin parlamentin Avropa işləri üzrə komitəsinə verdiyi yazılı cavabda deyilir.

"Danimarka hökuməti Ukrayna məsələsində Aİ Şurasında sədrliyinin ilk həftələrində Macarıstanın sədrliyindən açıq şəkildə uzaqlaşmaq istəyir", deyə Rasmussen bildirib.

Nazir əlavə edib ki, Danimarka indi dövlət qulluqçularını yalnız nazirlərin Macarıstandakı qeyri-rəsmi görüşlərini işıqlandırmaq üçün göndərəcək.

İsveç, Finlandiya, Estoniya, Latviya, Litva və Polşa da ötən həftə Macarıstanda keçiriləcək nazirlərin iclaslarında yalnız dövlət qulluqçuları ilə təmsil olunacaqlarını bildiriblər.

Xəbər verdiyimiz kimi, iyulun əvvəlində Macarıstanın baş naziri Viktor Orban Kiyevə səfərindən sonra Moskva və Pekinə gözlənilməz səfərlər edib və burada Ukraynada müharibəyə son qoymaq üçün “sülh təşəbbüslərini” müzakirə etməyə çalışıb. Avropa Şurasının sədri Şarl Mişel və Aİ-nin Ali Nümayəndəsi Cozep Borrell də daxil olmaqla Aİ liderləri hazırda Aİ Şurasına sədrlik edən Macarıstanın baş nazirinin belə bir missiyanı həyata keçirmək üçün heç bir səlahiyyət almadığını və yalnız öz adından hərəkət etdiyini bildirib.

Samir