Fələstinin HƏMAS hərəkatı çərşənbə günü Qətərdə cümə axşamı keçirilməsi planlaşdırılan Qəzzada atəşkəs danışıqlarının yeni raundunda iştirak etməyəcəklərini bildirib.

HİT.az xəbər verir ki, bu barədə “Reuters” məlumat yayıb.

ABŞ cümə axşamı Qətərin paytaxtı Dohada planlaşdırıldığı kimi dolayı danışıqların keçiriləcəyini gözlədiyini və atəşkəs razılaşmasının hələ də mümkün olduğunu bildirib.

İsrail hökuməti cümə axşamı danışıqlara nümayəndə heyəti göndərəcəyini bildirib, lakin HƏMAS ABŞ və müttəfiqlərindən yeni danışıqlar deyil, artıq qəbul etdiyi təklifi həyata keçirmək üçün işlək plan tələb edib.

"HƏMAS iyulun 2-də ona təqdim edilən, BMT Təhlükəsizlik Şurasının qətnaməsi və Baydenin çıxışına əsaslanan təklifə sadiqdir və hərəkat dərhal onun həyata keçirilməsi mexanizmini müzakirə etməyə hazırdır", deyə HƏMAS-ın yüksək səviyyəli nümayəndəsi Sami Əbu Zuhri bildirib. 

Üç yüksək rütbəli İran rəsmisi daha əvvəl bildirmişdilər ki, yalnız Qəzzada atəşkəs razılaşması İranın keçən ay HƏMAS lideri İsmayıl Haniyənin öldürülməsinə görə İsraildən birbaşa qisas almasına mane ola bilər.

Atəşkəs razılaşması Qəzzada döyüşlərə son qoymaq və İsrail tərəfindən həbsdə olan çoxlu fələstinlinin əvəzində Həmas tərəfindən anklavda saxlanılan israilli girovların azad edilməsini təmin etmək məqsədi daşıyır.

Bununla belə, HƏMAS girovların azad edilməsinin əsas şərti kimi müharibənin dayandırılması və İsrail qüvvələrinin Qəzzadan çıxarılması ilə bağlı razılığın əldə olunmasını tələb edir, İsrailin baş naziri Benyamin Netanyahu isə yalnız çox sayda girovun geri qayıtmasına icazə vermək üçün hərbi əməliyyatlara fasilə verəcəyini söyləyir. O, dəfələrlə bəyan edib ki, müharibə ancaq HƏMAS-ın sıradan çıxarılması ilə bitə bilər.

Samir