Almaniyada arxeoloqlar Frayburq şəhəri yaxınlığındakı Qlottertal dağ icmasında işçilər orta əsrlərə aid bir neçə sikkə tapdıqdan sonra böyük gümüş xəzinə aşkar ediblər. 

HİT.az xəbər verir ki, bu barədə Ştutqart Regional Şurasının (RPS) rəsmi saytı məlumat yayıb.

İnşaatçılar hovuz üçün borular çəkərkən təsadüfən orta əsr gümüşü ilə rastlaşıblar. Əraziyə gələn elm adamları bir neçə yanaşmada yerdən 14-cü əsrə aid 1500-dən çox zərb edilmiş gümüş sikkə çıxarıblar.

Tədqiqatçıların fikrincə, kimsə böyük bir sərvəti yerə basdırıb. Orta əsr Almaniyasında gizli pulla 150 qoyun sürüsü almaq olardı.

Təmizlədikdən sonra mütəxəssislər müəyyən ediblər ki, sikkələr böyük ehtimalla 1320-ci illərdə indiki Almaniya, İsveçrə və Fransa ərazisində zərb edilib.

Alimlər qeyd ediblər ki, tapıntı 1949-cu ildən bəri Frayburq yaxınlığında tapılan ən böyük xəzinədir. Arxeoloqlar aydınlaşdırdılar ki, orta əsrlərdə Qlottertal mühüm mədən sahəsi olub. Gümüş mədənləri burada 9-cu əsrdə yaranıb.

Samir