"Ukrayna Rusiya ilə danışıqlardan əvvəl öz mövqeyini gücləndirmək niyyəti ilə tarixi Kursk əməliyyatına başladı".
Bu sözləri Azərbaycan Yəhudi Media Mərkəzinin politoloqu Rüstəm Tağızadə Hit.az-a açıqlamasında deyib.
Lakin o bildirib ki, Ukraynanın Kursk vilayətini Rusiya ilə danışıqlara qədər əlində saxlaya bilib-bilməyəcəyinə bir neçə amil təsir göstərəcək:
"Bu amillərə hərbi güc, strateji planlaşdırma və Rusiyanın cavab tədbirləri daxildir. İlk növbədə, Ukrayna öz hərbi qüvvələrini yaxşı silahlandırmalı və Kursk vilayətində uzunmüddətli müdafiəni davam etdirməlidir. Ümumiyyətlə, təkcə bölgəni əldə saxlamaq ilkin uğur deyil. Həmçinin, Rusiyanın potensial əks-hücumlarını dəf etmək bacarığı da lazımdır".
Ekspert qeyd edib ki, Ukraynanın coğrafi və strateji yerləşməsi də böyük əhəmiyyətə malik olacaq:
"Nəzərə almaq lazımdır ki, Kursk vilayəti relyefinə və əsas təchizat xətlərinə yaxınlığına görə tarixən strateji məkan olub. Ona görə də bu əraziyə nəzarət Ukraynaya əhəmiyyətli üstünlüklər verəcək. Bundan başqa, Rusiyanın Kursku geri almaq üçün intensiv səylərinin olacağı da gözlənilir.
Böyük ehtimalla, Rusiya Ukraynanın Kursk vilayətində hər hansı irəliləyişinə aqressiv cavab verəcək və öz hərbi imkanlarından istifadə edərək nəzarəti bərpa etməyə çalışacaq. Ukrayna isə bölgədəki mövqeyini qorumaq üçün bu hərəkətləri qabaqcadan görməli və onlara qarşı durmağı bacarmalıdır".
Politoloqun sözlərinə görə, Ukraynanın Kursk vilayətini nəzarətdə saxlamağa davam etməsi Rusiya ilə danışıqların dinamikasına təsir edə bilər:
"Əgər Ukrayna əraziyə güclü nəzarət nümayiş etdirərsə, rəsmi Kiyev potensial olaraq daha əlverişli şərtlərə gətirib çıxara biləcək güc mövqeyindən danışıqlara başlaya bilər. Hesab edirəm ki, Ukrayna Kursku nəzarətində saxlaya bilsə, Rusiya ilə danışıqlarda ciddi üstünlük əldə edə bilər. Üstəlik, ərazi nəzarəti, təhlükəsizlik zəmanətləri və ya digər siyasi güzəştlər baxımından Ukrayna üçün daha əlverişli nəticələrin yaranması da mümkündür.
Lakin Ukraynanın danışıqlardan əvvəl Rusiyanın əks-hücumları nəticəsində Kursku itirməsi onlar üçün ən pis variant olar. Çünki bu, Ukraynanın mövqeyini zəiflədə və danışıqlarda daha az əlverişli şərtlərə getməsinə səbəb olar".
Rüstəm Tağızadə vurğulayıb ki, Ukraynanın Rusiya ilə danışıqlara qədər Kursk bölgəsini saxlaya bilib-bilməyəcəyi hərbi, strateji və diplomatik amillərin mürəkkəb qarşılıqlı təsirindən asılı olacaq:
"Əgər Ukrayna bu amilləri effektiv şəkildə idarə edə bilsə, Kursk vilayətinə nəzarəti saxlaya və bununla da danışıqlarda əlini gücləndirə bilər. Bununla belə, son nəticə isə həm Ukraynanın, həm Rusiyanın, həm də daha geniş beynəlxalq ictimaiyyətin hərəkətlərindən və cavablarından asılı olacaq".
Pərviz
