Fransa prezidenti Emmanuel Makron əmin edir ki, o, ölkə üçün ən yaxşı həll yolunu tapmaq məqsədilə yeni baş nazir axtarışında hər cür səy göstərir.

HİT.az BFMTV-yə istinadən xəbər verir ki, bu barədə o, cümə axşamı axşam Serbiyanın paytaxtı Belqrada səfəri zamanı bildirib.

"İnanın, gecə-gündüz hər cür səy göstərirəm. Mən bunu həftələrlə edirəm, hətta siz bunu mütləq görməsəniz belə, ölkə üçün ən yaxşı qərara gəlmək üçün edirəm", deyə Makron bildirib.

O, həmçinin hakimiyyətdən gedən hökumətin müəyyən çətinliklərlə üzləşdiyini bildirib, lakin "hökumət öz işini görmür" fikrini təkzib edib.

Qeyd olunur ki, prezident Makron tərəfindən parlamentin buraxılmasından 50 gündən çox vaxt keçməsinə baxmayaraq, Fransada yeni hökumət hələ formalaşmayıb.

İyulun əvvəlində keçirilən növbədənkənar parlament seçkilərinin nəticələrinə görə, Milli Assambleya üç böyük bloka bölünüb: Yeni Xalq Cəbhəsi sol partiyaların alyansı (193 deputat), Makronun mərkəzçi koalisiyası (166 deputat) və ultrasağçı Milli Cəbhə (142 deputat).

Bununla belə, hazırda dövlət başçısı artıq bir variantı istisna edib: baş nazir vəzifəsinə yüksək vəzifəli dövlət qulluqçusu Lüsi Kastesi təklif edən solçu Yeni Xalq Cəbhəsi koalisiyasının hökumətini.

İyunun 30-da və iyulun 7-də Fransada növbədənkənar parlament seçkilərinin iki turu keçirilib. Solçu Yeni Xalq Cəbhəsi qələbə qazanıb, prezident düşərgəsi ikinci, ifrat sağçı Milli Cəbhə və müttəfiqləri isə üçüncü olub.

Samir