Bolqarıstanın xarici işlər naziri İvan Kondov bildirib ki, Ukrayna NATO-ya tamhüquqlu üzv olduqda Şimali Atlantika Alyansına üzv olan ölkələr tam təhlükəsiz olacaq.

HİT.az xəbər verir ki, Bolqarıstan Xarici İşlər Nazirliyinin mətbuat xidmətinin məlumatına görə, Kondov bunu ABŞ dövlət katibi Entoni Blinkenin ev sahibliyi ilə Avropa İttifaqı və NATO xarici işlər nazirlərinin ənənəvi transatlantik şam yeməyində deyib. 

Forumda həmkarları qarşısında çıxış edən Kondov deyib ki, NATO-nun əhəmiyyəti və gücü bugünkü çağırışlar fonunda fundamental təhlükəsizlik faktoruna çevrilib və bunu 20 il əvvəldən çox az adam proqnozlaşdıra bilərdi.

Xarici İşlər Nazirliyi də nazirlik rəhbərinin aşağıdakı sözlərini yayıb:

"O, həmçinin qeyd edib ki, Ukrayna NATO-ya tamhüquqlu üzv olduqdan sonra bütün üzv dövlətlər təhlükəsiz olacaq”.

Bolqarıstanın xarici işlər naziri çıxışında NATO-nun şərq cinahının və Qara dəniz regionunun təhlükəsizliyinin gücləndirilməsinin bütün ölkələrin təhlükəsizliyi üçün böyük əhəmiyyət kəsb etdiyini vurğulayıb. O qeyd edib ki, Bolqarıstan bu istiqamətdə müəyyən səylər göstərir.

Qeyd edildiyi kimi, transatlantik şam yeməyi ənənəvi olaraq BMT Baş Assambleyasının illik sessiyasının açılışı çərçivəsində ABŞ dövlət katibi tərəfindən NATO və Aİ ölkələrinin xarici işlər nazirləri üçün təşkil olunur.

Bundan əlavə, Kondov ABŞ-ın ən nüfuzlu yəhudi təşkilatlarından biri olan Amerika Yəhudi Komitəsinin (AJC) nümayəndələri ilə danışıb.

"Nazir Kondov həmsöhbətləri ilə həm regional, həm də qlobal əhəmiyyət kəsb edən aktual mövzuları, məsələn, Yaxın Şərq münaqişəsi və Rusiyanın Ukraynada davam edən müharibəsi, eləcə də təşkilatın ABŞ-la qarşılıqlı faydalı əməkdaşlığın gücləndirilməsinə verdiyi dəstəyi müzakirə etmək imkanı əldə edib. xüsusilə, təhlükəsizlik və müdafiə, ticarət və investisiya, enerji təhlükəsizliyi və diversifikasiya, turizm və insanlar arasında əlaqələrin təşviqi kimi əsas sahələrdə”, deyə mətbuat xidməti bildirib.

Samir