İsrailin baş nazirinin ofisi keçən həftə Ağ Evə Livandakı münaqişənin diplomatik yolla həlli üçün şərtlərini əks etdirən sənəd göndərib. 

HİT.az xəbər verir ki, "Axios"un Vaşinqton və Təl-Əvivdəki mənbələrə istinadən verdiyi məlumata görə, ABŞ prezidentinin xüsusi nümayəndəsi Amos Hokşteyn oktyabrın 21-də Beyruta səfəri zamanı bu planı Livan hökumətinə təqdim etməli olacaq.

Adının çəkilməsini istəməyən İsrail rəsmisinin sözlərinə görə, sənəd İsrailin strateji işlər naziri Ron Dermer ilə ölkənin Müdafiə Nazirliyi arasında aparılan danışıqlardan sonra hazırlanıb. İclasda “Hizbullah"la müharibəyə son qoymağa yönəlmiş istənilən diplomatik həllə daxil edilməli olan tədbirlər müzakirə olunub. Təl-Əvivin tələblərindən biri də "Hizbullah"ın Livanın cənub sərhədində hərbi infrastrukturunu yenidən qurmamasını təmin etmək üçün İDF-yə aktiv hərəkətə icazə verilməsidir. İsrail həmçinin bu ölkənin hərbi hava qüvvələrinin Livanın hava məkanında tam sərbəst hərəkət etməsini tələb edir.

Adı açıqlanmayan amerikalı rəsminin sözlərinə görə, Livan və beynəlxalq ictimaiyyət çətin ki, İsrailin tələbləri ilə razılaşsın. O hesab edir ki, bəyan edilən şərtlər Livanın suverenliyinə xələl gətirir. Həmçinin qeyd edilir ki, hər iki tələb BMT Təhlükəsizlik Şurasının 1701 saylı qətnaməsinə ziddir və İsrail və Hizbullah arasında atəşkəsin qorunmasına görə məsuliyyəti Livan Silahlı Qüvvələri və BMT-nin Livandakı Müvəqqəti Qüvvələri (UNIFIL) üzərinə qoyur.

Hokşteyn ən azı 8000 Livan hərbçisinin ölkənin cənub sərhədinə yerləşdirilməsi üçün səy göstərməyi planlaşdırır. Son illər orada Livan ordusunun mövcudluğu məhdudlaşıb və ərazi "Hizbullah"ın nəzarətində olub. Amerika prezidentinin xüsusi nümayəndəsi həmçinin Livan hərbi personalına kömək edə bilmələri üçün UNIFIL-in mandatının genişləndirilməsini xahiş etmək niyyətindədir.

Sentyabrın 23-də İsrail "Hizbullah"dan gələn təhlükəni aradan qaldırmaq və təxliyə edilmiş israilliləri ölkənin şimalındakı evlərinə qaytarmaq məqsədi ilə hərbi əməliyyata başlayıb. Oktyabrın 18-də İDF şimal cəbhəsində tapşırıqları yerinə yetirmək üçün ehtiyat briqadanın səfərbər edilməsinə qərar verdi. Oktyabrın 20-də İsrail qrupun bütün Livandakı iqtisadi obyektlərinə zərbələr endirib.

Samir