Almaniyanın iqtisadi çətinlikləri və miqrasiya böhranı fonunda hakim koalisiya (SPD, Yaşıllar və FDP) daxili parçalanmalarla üzləşir.

HİT.az xəbər verir ki, son hadisələr yalnız koalisiyanın mümkün dağılması ilə bağlı fərziyyələri gücləndirib: kansler Olaf Şolts və maliyyə naziri Kristian Lindner bir-birini dəvət etmədən paralel iqtisadi sammitlər təşkil ediblər. 

Siyasi çətinliklər xüsusilə reytinqi 5%-dən aşağı olan FDP-dən olan liberallar üçün ağrılıdır - partiya növbəti seçkilərdə ümumiyyətlə Bundestaqa daxil olmamaq riski ilə üzləşib.

Azad Demokratik Partiyasının (FDP) baş katibi Bijan Jir-Saray "Bild"ə müsahibəsində partiyanın hakim koalisiyadan çıxa biləcəyini açıqlayıb.  "Yaxın günlərdə partiya iclaslarında şəxsi mövqeyimi səsləndirəcəyəm" deyən baş katib FDP-nin hökuməti tərk etməyi tövsiyə edə biləcəyinə işarə vurub.

O, konkret tarixlər deməsə də, koalisiyanın gələcəyi ilə bağlı qərarın payızın sonuna qədər verilməli olduğunu vurğulayıb.

İqtisadi siyasət koalisiya daxilində əsas mübahisəli məqamlardan biri olaraq qalır. FDP iqtisadiyyatı dəstəkləmək üçün vergi güzəştləri və aşağı enerji qiymətləri tələb edir, lakin SPD və Yaşılların müqaviməti ilə üzləşir.

"İstənilən hökumət öz-özünə bunun qeyri-sabitliyin bir hissəsi olub-olmadığını soruşmalıdır", deyə Bijan Jir-Saray bildirib.

FDP lideri Donald Trampın ABŞ prezident seçkilərində mümkün qələbəsinin Almaniyada hakim koalisiyanı qoruyub saxlamağa kömək edə biləcəyinə inanmır. Onun fikrincə, Almaniya öz iqtisadiyyatını gücləndirməyə diqqət etməlidir, çünki ABŞ getdikcə daha çox Çinlə rəqabətə diqqət yetirir, Avropa isə ABŞ üçün əhəmiyyətini itirir.

Samir