Amerikanın avtomobil istehsalçısı "Ford" 2027-ci ilin sonuna qədər Almaniyada 2900 işçini ixtisar etməyi planlaşdırdığını açıqlayıb. 

HİT.az xəbər verir ki, əsas zərbə Köln zavodunda olacaq, burada iş yerlərinin təxminən 1/4-i ləğv ediləcək.

Qərar şirkətin minik avtomobilləri seqmentində böyük itkiləri, elektromobillərin istehsalı üçün bahalı restrukturizasiyası və ciddi ekoloji standartlarla əlaqədardır. Vəziyyəti dövlət subsidiyalarının başa çatmasından sonra elektromobillərə tələbatın kəskin azalması ilə daha da gərginləşdirir.

"Biz "Ford"un Avropada rəqabət qabiliyyətini təmin etmək üçün çətin, lakin qətiyyətli tədbirlər görməyə məcburuq", "Ford"un icraçı direktoru Markus Vassenberq bildirib.

"Ford" elektromobillərin istehsalına başlamaq üçün Kölndəki zavodun modernləşdirilməsinə artıq iki milyard avroya yaxın sərmayə qoyub, lakin şirkətin gözləntiləri özünü doğrultmayıb və yeni modellərin satışı planlaşdırılandan aşağı olaraq qalır.

Maliyyə çətinlikləri fonunda şirkət həm də menecerlərin xaricə axını ilə üzləşib: məsələn, bu yay "Ford"un Almaniyadakı rəhbəri Martin Sander "Volkswagen"ə keçib.

Bundan əvvəl məlum olmuşdu ki, "Volkswagen" avtomobil konserni Almaniyadakı 10 zavoddan üçünü bağlamağı, eləcə də qalanlarının işini xeyli azaltmağı planlaşdırır. Bundan əlavə, şirkətin idarəetmə planlarına maaşların azaldılması və bütövlükdə departamentlərin xaricə autsorsinqə verilməsi daxildir.

Samir