ABŞ ordusu Çinin yeni H-20 strateji bombardmançı təyyarəsinin gələn onilliyə qədər hazır olacağını gözləmir. 

HİT.az xəbər verir ki, bu barədə Pentaqonun Çin Xalq Respublikasına həsr olunmuş hesabatına istinadən "The War Zone" nəşri məlumat yayıb.

"Çin yeni nəsil uzunmənzilli bombardmançı təyyarələr hazırlayır, çox güman ki, onlar H-20 adlanacaq. Nə vaxtsa debüt edə biləcək H-20 10.000 km-dən çox məsafə qət edəcək", deyə Amerika hərbi ekspertləri bildirir.

"The War Zone" Pentaqonun istifadə etdiyi bir qədər qeyri-müəyyən ifadələri qeyd edib. Söhbət təyyarənin istismara verilməsindən gedir, yoxsa sadəcə onun ilk kütləvi nümayişindən, bunlar aydın deyil.

Pentaqon mütəxəssisləri H-20-nin adi və nüvə silahlarından istifadə edə biləcəyini, həmçinin gizli texnologiyadan istifadə edilərək hazırlanacağını gözləyirlər.

Amerikalı mütəxəssislər bombardmançı təyyarənin dizaynı zamanı çinlilərin qarşılaşdıqları "çoxsaylı mühəndislik problemlərini" vurğulayırlar. Onlar əvvəllər deyiblər ki, perspektivli təyyarə Amerikanın B-21 gizli bombardmançı təyyarəsi qədər "yaxşı deyil".

Xian H-20 Sovet Tu-16-nın surəti olan köhnə Çin bombardmançısı H-6-nı əvəz etmək üçün yaradılır. Mütəxəssislərin fikrincə, H-20 2000-ci illərin əvvəllərində hazırlanmağa başlayıb.

Onun 10 tona qədər silah daşıya biləcəyi güman edilir. Xarici olaraq, yeni bombardmançı Amerikanın B-2 təyyarəsinə və ya yuxarıda qeyd olunan B-21 Raider-ə bənzəyəcək.

Xatırladaq ki, sonuncu ilk uçuşunu 2023-cü ilin noyabrında edib. ABŞ Hərbi Hava Qüvvələri ən azı 100 belə təyyarə almağı planlaşdırır.

Samir