Moskva Suriyadakı Rusiya hərbi mövcudluğu ilə bağlı dəyişikliklər gözləyir.

HİT.az xəbər verir ki, bu barədə Rusiya Xarici İşlər Nazirliyinin mətbuat xidmətindən "Kommersant"a bildirilib. 

"Şübhəsiz ki, Suriyada hakimiyyətin və yerlərdə vəziyyətin dəyişməsi Rusiyanın bu ölkədəki hərbi mövcudluğu ilə bağlı müəyyən düzəlişlər tələb edir", deyə XİN-dən bildiriblər.

Diplomatik idarə izah edir ki, söhbət təkcə Rusiya hərbi bazalarının qorunub saxlanmasından deyil, həm də onların fəaliyyət göstərməsinin, saxlanmasının və təminatının praktiki parametrlərindən, yerli tərəflə qarşılıqlı fəaliyyət prosedurundan gedir.

"Suriya əhalisinin xarici yardıma təcili ehtiyacını nəzərə alaraq, Rusiya bazalarına müvəqqəti olaraq humanitar mərkəzlərin əlavə rolu verilə bilər. Əlbəttə, bu mövzular Suriyanın yeni rəhbərliyi ilə danışıqların mövzusu ola bilər", deyə XİN-dən qeyd edilib.

Rusiya prezidenti Vladimir Putin daha əvvəl Suriyadakı hərbi bazalardan respublika sakinlərinə humanitar yardım çatdırmaq üçün istifadə etməyi planlaşdırdığını açıqlamışdı. Dekabrın 19-da birləşmiş birbaşa xətt və mətbuat konfransında çıxış edən Rusiya lideri bu ehtimalı etiraf edib və vurğulayıb ki, Moskva Suriyada rəhbərlik dəyişdikdən sonra bazaların qalıb-qalmayacağını hələ bilmir.

Rusiya hərbi qulluqçuları Tartusdakı dəniz bazası və Xmeymim aviabazasındadır. Rusiya aerokosmik qüvvələrinin Latakiya əyalətindəki mülki aerodrom ərazisinə yerləşdirilməsi ilə bağlı razılıq 2015-ci ildə əldə olunub. Hazırda Aralıq dənizində yeganə Rusiya hərbi dəniz bazasının yerləşdiyi Tartus limanı 2017-ci ildə Rusiya tərəfi tərəfindən 49 il müddətinə pulsuz istifadəyə verilib.

Samir