"Pep Qvardiolanın necə baş məşqçi olduğu "Mançester Siti"də və indiyə qədər çalışdığı klublarda əldə etdiyi nəticələrdən bəllidir".

Bu sözləri futbol mütəxəssisi Aslan Kərimov Hit.az-a açıqlamasında deyib. 

O, Qvardiolanın "Mançester Siti"dəki uğursuzluğu barədə danışıb:

"Hazırda onun əlində olan futbolçuların keyfiyyəti müzakirə mövzudur. Çünki Qvardiola hər zaman yüksək səviyyəli futbolçularla böyük uğurlar qazanırdı. Yəni işlədiyi bütün klublarda ən üst səviyyədə olan futbolçuları yanına toplamaq fəlsəfəsinə sahib məşqçidir. Onun oyun üslubu da TOP səviyyədə olan futbolçularla oynamağa və uğur qazanmağa imkan verir". 

Mütəxəssisin sözlərinə görə, son zamanlarda Mançester təmsilçisində nə baş verdiyi məlum deyil:

"Bəlkə futbolçular Qvardiolanı qəbul etmək cəhətdən yorulublar. Nəzərə almaq lazımdır ki, Qvardiola nə qədər emosional olsa da, bir az diktator kimi görünür. O, hər zaman futbolçulardan etmək istədiyini tələb edir. Bu isə hansısa nöqtədə ingilis futbolçular üçün bir az xoş gəlməyə bilər. Həmçinin, komanda daxilində hansısa xırda konfliktlərin olduğu açıq-aşkar görünür. Təbii ki, bu da onların performansına təsir göstərir".

Ekspertin sözlərinə görə, indiki vəziyyətdə Pep Qvardiolanı istefaya göndərmək doğru qərar olmaz:

"Düzdür, Qvardiola getsə, komandaya yeni bir qan gələ bilər. Bəlkə də o zaman tamam fərqli nəticələr qeydə alınar. Lakin "Mançester Siti"nin Qvardioladan sonra eyni uğurları qazanacağı da sual altındadır. Hətta bunu inandırıcı hesab etmirəm. 

İlkin mərhələlərdə nəyəsə nail ola bilərlər, amma ümumi mənada ondan sonra gələn baş məşqçi uğurlu olmayacaq. Ən azından Çempionlar Liqasını qazanacaqları inandırıcı deyil. Amma Qvardiola ilə bunu etmək mümkün oldu".

Aslan Kərimov hesab edir ki, Qvardiolaya bir il daha şans verilməlidir:

"Məncə, ona bir mövsüm daha şans verilməlidir. Əgər qalsa heyətdə ciddi dəyişikliklər edilməlidir. Çünki Qvardiola getsə, "Mançester Siti" onunla qazandıqları uğurların səviyyəsinə yenidən çıxa bilməyəcək".

Pərviz