Belarusun "İnteqral" müəssisəsi 2022-ci ilin mart - 2024-cü ilin iyun aylarında Rusiya Federasiyasına dəyəri 130 milyon dollardan çox olan altı milyondan çox mikrosxem tədarük edib.
HİT.az xəbər verir ki, bu barədə Belarus İstintaq Mərkəzi məlumat yayıb.
Müqayisə üçün deyək ki, bu müddət ərzində Belarus mikrosxemlərinin Rusiyaya tədarükünün ümumi həcmi 165 milyon dollardan bir qədər çox olub. Beləliklə, "İnteqral" tədarükün 80%-ni təmin edib.
2023-cü ildə şirkətin xalis mənfəəti 2022-ci illə müqayisədə 11 dəfədən çox artaraq 50 milyon dollara yaxın olub. Bu dövrdə "İnteqral" mikrosxemlərin ən böyük rus alıcısı "Smolensk" şirkəti olub. O, 31,3 milyon dollarlıq məhsul alıb.
İkinci ən böyük alıcı isə "İnteqral"dan 30 milyon dollar dəyərində mikrosxemlər alan Rusiyanın “Spets-Electronkomplekt” ASC şirkəti olub. Digər əsas alıcı Belarus "İnteqral"ının törəmə müəssisəsidir - "BM ASC Integral SPb" - şirkət 16,8 milyon dollarlıq çip alıb.
Belarus və Rusiya dövlət telekanallarının süjetlərindən də göründüyü kimi, "İnteqral" Qərb avadanlıqlarından fəal şəkildə istifadə edir. Kadrlarda istehsal proseslərində sterilliyi qorumaq üçün zəruri olan mikrosxemlərin keyfiyyətinə nəzarət üçün alman "Axiotron Carl Zeiss AG" mikroskopları, İsveçrə "VAT Vakuumventile AG" klapanları və Britaniya "Edwards" vakuum sistemləri göstərilir.
Aİ və ABŞ-ın Belarusa strateji əhəmiyyətli materialların və ikili təyinatlı avadanlıqların tədarükünü məhdudlaşdırmağa yönəlmiş sanksiyalarına baxmayaraq, İnteqral Qərb ölkələrindən lazımi komponentləri və xammalı almağa davam edir.
"İnteqral" üçün kritik əhəmiyyətli materiallar arasında hidrogen xlorid kimi tanınan yüksək təmizlikli xlorid turşusu da var.
2021-ci ildə Almaniyanın "UrSeCo Handels GmbH & Co" şirkəti tərəfindən Integral-a təmizliyi 99,999% olan xlorid turşusu verilib. 2022-ci ildə sanksiyaların tətbiqindən sonra yeni sxem ortaya çıxıb - tədarüklər Polşa və Türkiyə vasitəsilə Qazaxıstana aparılıb.
"İnteqral" üçün vacib olan digər texnologiyalar arasında MWM 2032 qaz mühərrikləri də var.
Samir
