BMT-nin İnsan Haqları Şurası (UNHRC) Banqladeşin keçmiş hökumətinin və təhlükəsizlik xidmətlərinin rəsmilərinin ötən ilin yayında hökumət əleyhinə etiraz aksiyalarının iştirakçılarına qarşı ciddi insan haqları pozuntularında əli olduğunu bildirib. 

HİT.az xəbər verir ki, bu barədə çərşənbə günü BMT-nin İnsan Haqları üzrə Ali Komissarı Volker Türk bildirib.

AFP-nin verdiyi məlumata görə, çərşənbə günü Volker Türk deyib ki, BMT İnsan Haqları Şurasının Banqladeşdə əvvəlki hökumət dövründə qətl, işgəncə, həbs və digər qeyri-insani hərəkətlər şəklində insanlığa qarşı cinayətlərin baş verdiyinə inanmaq üçün ağlabatan əsaslar var.

BMT-nin Banqladeşdə insan haqlarının pozulması ilə bağlı faktaraşdırıcı missiyasının hesabatında deyilir ki, hökumət, Avami Liqası partiyasındakı radikal ünsürlər və Banqladeşin təhlükəsizlik və kəşfiyyat xidmətləri tərəfindən törədilə biləcəyi iddia edilən cinayətlər “etirazçılara və digər mülki şəxslərə qarşı geniş yayılmış və sistematik hücumun” bir hissəsidir (AFP).

BMT-nin hesablamalarına görə, tələbə etirazlarının yatırılması zamanı 1400-ə qədər adam həlak ola bilər ki, onların da böyük əksəriyyəti Banqladeş təhlükəsizlik qüvvələri tərəfindən güllələnib. Daha minlərlə insan yaralanıb.

2024-cü ilin iyul ayının əvvəlindən Banqladeşdə korrupsiyaya qarşı kütləvi tələbə etirazları keçirilib. Aksiya iştirakçılarına qarşı terrorizm və təxribat fəaliyyəti ilə bağlı cinayət işi qaldırılıb. Avqustun 5-də keçirilən genişmiqyaslı etirazlar fonunda Şeyx Hasina Banqladeşin baş naziri vəzifəsindən istefa verdiyini açıqlayıb və ölkəni tərk edib. Avqust ayında ölkədə Nobel mükafatı laureatı Məhəmməd Yunusun rəhbərlik etdiyi yeni hökumət formalaşıb. Əvvəlki hakimiyyət onu korrupsiya sxemlərində və maliyyə fırıldaqlarında iştirakda ittiham edirdi. Baş nazir təyin edildikdən sonra o, məhkəmə tərəfindən bu ittihamlardan azad edilib və bununla da onu hədələyən ömürlük həbsdən yayınıb. "Kasıbların bankiri" kimi tanınan Yunus sərvətin ədalətli bölüşdürülməsi üçün Banqladeşin maliyyə sistemini yenidən quracağına söz verib.

Samir