Rusiyanın xarici işlər naziri Sergey Lavrov Qətərdə mətbuat konfransı zamanı bildirib ki, dondurulmuş Rusiya aktivlərinin taleyi məsələsi Ukrayna üzrə dialoqun gündəmindən çıxarılmayacaq. 

HİT.az bu barədə "RİA Novosti"yə istinadən xəbər verir.

"Əsasən avropalılar tərəfindən oğurlanan aktivlərimizə gəlincə, yox, bununla bağlı konkret müzakirələr aparılmayıb, lakin mən şübhə etmirəm ki, bu mövzu nizamlanma çərçivəsində aradan qalxmayacaq", deyə nazir bildirib.

Onun sözlərinə görə, Rusiya aktivlərinə qarşı istənilən hərəkət cavabsız qalmayacaq.

Fevralın 25-də “Politico” İtaliya, Portuqaliya, İspaniya və Macarıstanın dondurulmuş Rusiyanın aktivləri hesabına Ukraynaya 20 milyard avroluq yardımın verilməsinə qarşı çıxdığını bildirib. Nəşrin yazdığına görə, Almaniya və Fransa da belə bir tədbiri təsdiqləmək üçün heç bir istək nümayiş etdirmir və bu məsələdə ayaqlarını süründürürlər. Bundan əlavə, təşəbbüs hələlik Avropa Komissiyasının rəhbəri Ursula fon der Leyen tərəfindən təsdiqlənməyib.

Lavrov həmçinin bildirib ki, Amerika şirkətlərinin Rusiya ərazisində fəaliyyət göstərmə imkanı Konstitusiyaya uyğun olaraq nəzərdə tutulub. O əlavə edib ki, Rusiya və ABŞ-ın Ər-Riyaddakı nümayəndə heyətləri Amerika şirkətlərinin Rusiya Federasiyasında işə başlaması məsələsini qaldırmayıblar.

Bundan əvvəl “Financial Times” bəzi Amerika şirkətlərinin Rusiya bazarında fəaliyyətini bərpa etməyə ilkin maraq göstərdiyini, lakin hələlik bunun üçün heç bir konkret addım atmadığını yazıb.

Fevralın 21-də prezident Vladimir Putin bu barədə danışıb. Bildirib ki, Qərb şirkətlərinin Rusiyaya qayıtma ehtimalına ehtiyatla yanaşmaq lazımdır ki, əldə etdikləri potensialı itirməsin.

Öz növbəsində, Rusiya Federasiyası Baş nazirinin birinci müavini Denis Manturov qeyd edib ki, Qərb brendlərinin Rusiyaya qaytarılması şərtləri ilə bağlı müzakirələr yalnız anti-Rusiya sanksiyaları ləğv edildikdə başlaya bilər.

Samir