Almaniya Ordusu yeni kəşfiyyat gəmilərinin tikintisi üçün çox milyard dollarlıq müqavilə imzalayıb.

HİT.az "Bild"ə istinadən xəbər verir ki, Bundesver (Müdafiə Nazirliyi) bu gəmiləri "Flottendienstbots 424 sinfi" adlandırır. 

Bu mürəkkəb terminin arxasında Almaniya Hərbi Dəniz Qüvvələrinin gələcəyi dayanır. Almaniya 2029-cu ilə qədər üç belə gəmini istismara verməyi planlaşdırır.

Fevralın 25-də Volqastda (Meklenburq-Ön Pommern) Pene gəmiqayırma zavodunda bunlardan birincisinin tikintisinə rəsmi olaraq başlanılıb.

Təxminən 130 metr uzunluğunda olan bu gəmilər kəşfiyyat üçün nəzərdə tutulub və qabaqcıl sensor müşahidə, məlumatların emalı və ötürülməsi sistemləri ilə təchiz olunub. Onlar dünya okeanlarında alman donanmasının “gözü və qulağı” olacaqlar.

Bu yeni sinif gəmilər limana zəng etmədən bir ilədək dənizdə qala biləcəklər. Bu məqsədlə birbaşa açıq dənizdə yanacaq doldurmaq və ehtiyatları artırmaq imkanı təmin edilir. Bundan əlavə, gəmi helikopterlər üçün eniş meydançası ilə təchiz olunub və pilotsuz təyyarələri bortda qəbul etmək qabiliyyətinə malikdir.

Bir neçə milyard avro dəyərində olan gəmilərin inşası üçün müqavilə “Naval Vessels Lürssen Group”a verilib. Layihədə bir neçə Şimali Almaniya tərsanəsi iştirak edir, Pene gəmiqayırma zavodu ilk gəminin yay hissəsini tikir.

Volqastda Bundesver baş müfəttişinin müavini, general-leytenant Andreas Hoppe layihənin mümkün qədər tez həyata keçirilməli olduğunu vurğulayıb. Onun sözlərinə görə, Baltik dənizində vəziyyət getdikcə gərginləşir.

Hər gəminin göyərtəsində 100 nəfər olacaq, onların yarısı Hərbi Dəniz Qüvvələrinin dənizçiləri, digər yarısı isə Kiberməkan və İnformasiya Sistemləri bölməsinin hərbçiləri olacaq.

Yeni kəşfiyyat gəmiləri 30 ildən artıq xidmətdə olan köhnə Oste sinifli gəmiləri əvəz edəcək.

Samir