ABŞ Prezidenti Donald Tramp yenidən gündəm olub. 

O, bu dəfə də 3-cü dönəm prezident ola biləcəyini və zarafat etmədiyini deyib. Tramp bunun üçün müəyyən yollar olduğunu söyləyib. Hərçənd ki, ABŞ qanunlarına görə belə bir addımın atılması mümkün deyil. 

Sadəcə müharibə vəziyyətində prezidentin səlahiyyət müddətinin uzana biləcəyini nəzərə alsaq, Tramp nəyi fikirləşir? O, ABŞ-ni müharibə vəziyyətinə salaraq hakimiyyətdə qalmağı və ya başqa yolu düşünür?

Mövzu ilə bağlı politoloq Turan Rzayev Hit.az-a açıqlama verib. O bildirib ki, tarixdə bunun bir nümunəsi var:

"İkinci Dünya müharibəsi dövründə müharibəyə görə ABŞ prezidenti Franklin Delano Ruzveltin səlahiyyətləri uzadılmışdı. Ümumiyyətlə, antik yunan-roma demokratiyalarında da tiran seçilirdi, müharibə vəziyyətlərində onların səlahiyyətləri uzadılırdı. 

Nəzərə almaq lazımdır ki, ABŞ-nin də demokratiyası antik yunan-roma demokratiyalarının müasir variantıdır. Ona görə də Donald Trampın dediyində qeyri-adi bir şey yoxdur. Çünki müharibə olacağı təqdirdə, prezidentin səlahiyyətləri uzadıla bilər". 

Lakin ekspert belə bir prosesin olacağını düşünmür:

"Mən Trampın sırf buna görə müharibə başladacağını düşünmürəm. O, buna ehtiyac görməz. Çünki müharibə xərc tələb edir. Üstəlik, ABŞ kimi ölkə üçün müharibə aparmaq ikiqat xərc tələb edir. Tramp isə biznesmen olduğu üçün bunları yaxşı hesablayar".

Pərviz