Braziliya ABŞ-ın bütün dünyada başlatdığı qlobal ticarət müharibəsində özünü ən əlverişli mövqedə tapıb. 

HİT.az xəbər verir ki, bu barədə Amerikanın “The Wall Street Journal” (WSJ) qəzeti yazır.

İnvestorlar hesab edirlər ki, Braziliya Donald Trampın ilk dövründə olduğu kimi vəziyyətdən faydalana bilər. Məsələn, Çin artıq Braziliya soya ehtiyatını toplamağa başlayıb. ABŞ-ın kənd təsərrüfatı məhsullarına tətbiq etdiyi 15 faizlik rüsumlara Pekin belə cavab verib. Braziliyalı fermerlər də pambıq və toyuğa yüksək tələbatın olacağını proqnozlaşdırırlar. Braziliya da ABŞ-a ayaqqabı ixracını artıra bilər.

Üstəlik, analitiklər hesab edirlər ki, Tramp Braziliyaya tariflər tətbiq etsə belə, onlar Çindəkindən daha aşağı olacaq.

San-Pauluda yerləşən APCE konsaltinq firmasının baş iqtisadçısı Andre Perfeito bildirib: "Tramp ticarəti yenidən strukturlaşdırır və bu, imkanlar yaradır".

Bundan əvvəl "Bloomberg" məlumat vermişdi ki, Tramp aprelin 2-dən bütün ölkələr üçün qarşılıqlı tariflər tətbiq etməyə başlayacaq. ABŞ administrasiyası hələlik bütün təfərrüatları, yəni hansı tariflərin tətbiq ediləcəyini və ölkələrin onlardan necə qaça biləcəyini açıqlamayıb. Yalnız məlum olan odur ki, onlar dünya ticarətini yenidən balanslaşdırmaq və ABŞ-da hasilatı artırmaq məqsədi daşıyır.

Samir