"İranlılar ölkəni işğal edən hər kəsin ayağını kəsəcəklər". 

HİT.az İRNA-ya istinadən xəbər verir ki, bunu İran parlamentinin Milli Təhlükəsizlik və Xarici Siyasət Komitəsinin sədri İbrahim Əzizi ABŞ hakimiyyətinin təhdidlərinə cavab olaraq deyib.

"Hər hansı bir təcavüzkar İranın müqəddəs ərazisinə ayaq basarsa, biz onun ayağını kəsəcəyik. İslam İnqilabının ideyalarına görə, biz müharibələrin heç birinin təşəbbüskarı olmamışıq, lakin təcavüzkarlarla qəti və sərt şəkildə üzləşməyi öyrənmişik", deyə Əzizi bildirib.

Bundan əvvəl İranın BMT-dəki daimi nümayəndəsi Əmir Səid İrəvani təşkilatın Təhlükəsizlik Şurasına məktub göndərərək, Trampın Tehrana qarşı təhdidlərini pisləməyi tələb etmişdi.

Martın 28-də ABŞ prezidenti Donald Tramp deyib ki, əgər respublika hakimiyyəti Vaşinqtonla nüvə proqramı ilə bağlı razılığa gəlməsə, İrana pis hadisələr gələ bilər. Ağ Ev rəhbəri İran hakimiyyətinə göndərilən məktubu xatırladıb. Orada o, ya Vaşinqton və Tehranın danışıb məsələləri müzakirə edəcəyini, ya da İranın bunun nəticələri ilə üzləşəcəyini qeyd edib.

Samir