Turistlər üçün ən ucuz yemək və içki Kosovonun Priştina şəhərində, ən bahalısı isə Norveçin Oslo şəhərindədir.

HİT.az xəbər verir ki, səyahət platforması "Omio" turistlərin restoran və kafelərdə nə qədər xərc çəkdiyini araşdıraraq, Avropada yemək və içki qiymətlərinin ən aşağı və ən yüksək olduğu şəhərlərin siyahısını tərtib edib. Bu araşdırma çərçivəsində orta hesabla yeməyin, kapuçinonun, yerli və idxal pivəsinin qiymətləri təhlil edilib.

Ən ucuz yemək və içki olan şəhərlər

Reytinqin ilk pilləsində Kosovonun paytaxtı Priştina qərarlaşıb. Burada orta hesabla bir nahar 4,18 funt sterlinq, yerli pivə 1,67 funt sterlinq, kapuçino isə cəmi 1,02 funt sterlinqə başa gəlir.

Ən ucuz yemək və içki təklif edən digər şəhərlər isə əsasən Balkan regionunda yerləşir. İlk üçlüyə Bosniya və Herseqovinanın paytaxtı Sarayevo və Şimali Makedoniyanın paytaxtı Skopye də daxildir. Ümumilikdə, ən ucuz yemək və içki olan şəhərlərin ilk onluğu əsasən Mərkəzi və Şərqi Avropadan olan şəhərlərdən ibarətdir.

Avropada yemək və içki qiymətləri ən aşağı olan 10 şəhər:

1. Priştina, Kosovo
2. Sarayevo, Bosniya və Herseqovina
3. Skopye, Şimali Makedoniya
4. Kişinyov, Moldova
5. Minsk, Belarus
6. Podqoritsa, Monteneqro
7. Praqa, Çexiya
8. Budapeşt, Macarıstan
9. Sofiya, Bolqarıstan
10. Tirana, Albaniya

Ən bahalı yemək və içki olan şəhərlər

Araşdırmanın nəticələrinə görə, Avropada ən bahalı restoran və kafelər əsasən Qərbi və Şimali Avropada yerləşir. Siyahının ilk pilləsində Norveçin paytaxtı Oslo qərarlaşıb. Burada nahar üçün orta hesabla 20,30 funt sterlinq, yerli pivə üçün 8,83 funt sterlinq, kapuçino üçün isə 3,70 funt sterlinq ödəmək lazım gəlir.

Avropada yemək və içki qiymətləri ən yüksək olan 10 şəhər:

1. Oslo, Norveç
2. Vaduts, Lixtenşteyn
3. Reykyavik, İslandiya
4. Kopenhagen, Danimarka
5. Bern, İsveçrə
6. Monako
7. Dublin, İrlandiya
8. Helsinki, Finlandiya
9. Amsterdam, Niderland
10. Lüksemburq, Lüksemburq

Samir