ABŞ Prezidenti Donald Trampın Rusiya Prezidenti Vladimir Putin ilə harada görüşəcəyi maraq doğurmağa davam edir. 

Rusiya və ABŞ nümayəndə heyətlərinin Səudiyyə Ərəbistanında görüşməsinin ardından liderlərin də Ər-Riyadda bir araya gələcəyi proqnozlaşdırılır. Lakin son zamanlarda Tramp və Putin arasında keçiriləcək görüşün Türkiyədə də baş tuta biləcəyi ehtimal olunmağa başlayıb. Bu tarixi zirvə üçün isə İstanbul önplana çıxır. 

Bəs Tramp-Putin görüşü Türkiyədə keçirilə bilərmi? 

Siyasi və Hüquqi Araşdırmalar Mərkəzinin (SHAM) sədri Xəyal Bəşirov Hit.az-a açıqlamasında bildirib ki, Donald Tramp yenidən ABŞ Prezidenti seçildikdən sonra onunla rusiyalı həmkarı Vladimir Putin arasında Ukrayna müharibəsi və bir sıra həlledici məsələlərin müzakirəsi ilə bağlı görüşün keçiriləcəyi gözlənilir:

"Yəni görüşdə əsas prioritet kimi Rusiya-Ukrayna müharibəsi götürüləcək. Lakin onlar arasında müzakirə olunacaq digər məqamlar da var. Əslində, əvvəllər görüşün Türkiyədə keçirilmə ehtimalı böyük idi, amma sonradan Səudiyyə Ərəbistanında keçirilməsi aktuallaşdı". 

Lakin ekspert qeyd edib ki, hazırda da Türkiyə bu görüşə ev sahibliyi edə bilər:

"Düşünürəm ki, Tramp və Putin görüş üçün Türkiyəni seçə bilər. İstanbul hər iki dövlət üçün rəmzi məna daşıyan şəhərdir. Eyni zamanda, Türkiyə dövləti və Prezident Rəcəb Tayyib Ərdoğanın son zamanlarda yürütdüyü siyasət də göz qabağındadır. Üstəlik, Türkiyə həm ABŞ, həm də NATO ölkələri ilə müttəfiqdir. 

Həmçinin, Ankara ilə Moskva arasındakı münasibətlərdə də etimad mühiti formalaşıb. Bundan başqa, Putin və Ərdoğan arasındakı şəxsi münasibətləri də nəzərə almaq lazımdır. 

Bütün bunlara görə görüşün Türkiyədə keçirilmə ehtimalı var. Daha dəqiq desək, hazırda bunun üçün ən optimal variant Səudiyyə Ərəbistanı və Türkiyədir. Ancaq görüşlərin keçirilmə ardıcılığına baxsaq, Səudiyyə Ərəbistanının bu cəhətdən bir addım öndə olduğu görünür".

Pərviz