Avropa İttifaqı ABŞ-ın Ukraynada başlatdığı atəşkəs danışıqlarını dəstəkləyir, lakin əmindir ki, istənilən belə danışıqlar Kiyevin mövqeyini gücləndirəcək, çünki Putin sülhə nail olmaq üçün beynəlxalq səylərə tamamilə məhəl qoymadığını nümayiş etdirir.

HİT.az xəbər verir ki, bunu Avropa Komissiyasının sözçüsü Anita Gipper Brüsseldə keçirdiyi brifinqdə bildirib.

“Rusiyanın hər gün nümayiş etdirdiyi hərəkətlərə, o cümlədən 9 uşaq da daxil olmaqla 20 mülki şəxsin ölümünə səbəb olan son hücuma gəldikdə, Rusiya danışıqlara tam hörmətsizlik və onların davam etdirilməsində sıfır maraq nümayiş etdirir. Buna görə də atəşkəsin təmin edilməsi və ədalətli, hərtərəfli və davamlı sülhə nail olmaq çox vacibdir. Lakin biz hər gün öz qanlı hücumlarını davam etdirən Putinlə münasibətdə sadəlövh ola bilmərik, deyə sözçü qeyd edib.

O qeyd edib ki, Aİ ABŞ-ın sülh təşəbbüslərini dəstəkləyir, çünki Ukraynaya sülh və atəşkəs lazımdır və heç kim ukraynalılardan çox sülhə nail olmaq istəmir.

"Sülh danışıqlarının davam etməsi çox vacibdir. Lakin bu sülh danışıqlarının nəticələri Ukraynanı gücləndirməlidir, çünki Putin zəifliyə hörmət etmir. Biz Ukraynanın güc mövqeyinə malik olmasını təmin etməliyik. Ona görə də biz müdafiə dəstəyini və bu istiqamətdə öz imkanlarımızı artırmağı öhdəmizə götürmüşük", deyə Gipper bildirib.

Samir