Avropa İttifaqı ABŞ-dan qaz idxalının artırılması ilə bağlı danışıqları bərpa etməyə hazırlaşır. Brüssel bu təşəbbüslə ABŞ prezidenti Donald Trampı iqtisadiyyata zərər vuran tariflərdən çəkinməyə və daha açıq dialoqa cəlb etməyə ümid edir.

HİT.az xəbər verir ki, "Politico" nəşrinin məlumatına görə, Aİ ABŞ-dan maye təbii qaz (MTQ) alışını artırmaq üçün yeni təkliflər hazırlayır. Məqsəd, transatlantik ticarətlə bağlı Trampın narazılığını yumşaltmaqdır.

Mənbələrin bildirdiyinə görə, Aİ Avropada ümumi və daha böyük qaz sifarişlərinin verilməsi yollarını araşdırır. Bununla həm ABŞ-ın tələblərini qarşılamaq, həm də daha rəqabətli qiymətlər əldə etmək hədəflənir.

Diplomatların sözlərinə görə, Aİ bir neçə aydır Tramp administrasiyasını danışıqlara cəlb etməyə çalışsa da, bu təşəbbüslər qeyri-müəyyənlik və Vaşinqtonun maraq göstərməməsi ilə qarşılaşıb. Lakin hazırkı şərait dəyişib – maliyyə bazarları enişdədir və biznes liderləri Trampdan siyasətində korrektə etməyi xahiş edirlər.

“Bu təkliflər uzun müddətdir müzakirə olunur, lakin düşünürük ki, indi real irəliləyiş üçün fürsət yaranıb”, deyə Avropa İttifaqı rəsmilərindən biri bildirib.

Qeyd olunur ki, MTQ-ni hökumətlər deyil, özəl şirkətlər alır. Bəzi Aİ ölkələri bildiriblər ki, onların şirkətləri artıq ABŞ-dan daha çox qaz idxal edir. Lakin tələbatın birləşdirilməsi mexanizminin nə dərəcədə səmərəli olacağı hələlik bəlli deyil. Aİ bu modeli 2022-ci ildə Rusiyanın Ukraynaya genişmiqyaslı hücumundan sonra tətbiq etmişdi, amma bu təşəbbüsə yalnız bir neçə şirkət maraq göstərmişdi.

Bununla belə, özəl təchizatçıların sifarişlərini birləşdirmək və onları ABŞ-dakı satıcılarla əlaqələndirmək, Aİ-nin daha çox amerikalı MTQ əldə etməsinin mümkün yollarından biri hesab olunur.

Danışıqlarda əsas müzakirə mövzularından biri də MTQ-nin qiymətidir. Aİ üzv ölkələrdən tələb edir ki, hər il 1 noyabra qədər qaz anbarlarını ən azı 90 faiz səviyyəsində doldursunlar. Lakin paytaxtlarda bu qaydaların sərtliyi ilə bağlı narahatlıq var: yay aylarında tələsik alışlar qiymətlərin artmasına səbəb ola bilər. Bir çox ölkə bu qaydaların yumşaldılmasını istəyir ki, daha az xərclə qaz tədarükü mümkün olsun.

Samir