Milyarder İlon Mask ABŞ Hökumətinin Səmərəliliyi Departamentinin (DOGE) rəhbəri vəzifəsini tərk etmək istəyir. Onun xüsusi dövlət işçisi statusu 2025-ci ilin mayında başa çatır və bu müddətin uzadılıb-uzadılmayacağı hələ məlum deyil.

HİT.az xəbər verir ki, bu barədə "The Washington Post" mənbələrə istinadən yazır.

Qeyd edilir ki, Mask bütün federal işçilərə böyük nailiyyətləri əks etdirən həftəlik elektron məktublar göndərməyi əmr edib. Bu tələbə əməl etmədiklərinə görə işçilər işdən çıxarılmaqla hədələnib.

Jurnalistlər bu vəziyyəti onlarla dövlət qurumlarının rəhbərləri və işçiləri ilə müzakirə ediblər. Məlum olub ki, məmurlar əvvəldən bu direktivin əsas müddəalarını həyata keçirməkdən imtina ediblər.

Nəşr vurğulayır ki, İlon Mask 2025-ci ilin mayında vəzifəsini tərk etməyə hazırlaşır və onun ABŞ hökumətindəki nüfuzu zəifləməkdə davam edir. Mənbələrdən birinə görə, milyarder DOGE rəhbəri kimi fəaliyyətini davam etdirmək istəmir, çünki o, xoşagəlməz və qeyri-etik, onun fikrincə, “solçu siyasi qüvvələrin hücumlarına” dözməkdən yorulub. O, əlavə edib ki, Mask onun gedişinin DOGE-nin effektivliyinə təsir etməyəcəyinə əmindir.

"Reuters" daha əvvəl bildirmişdi ki, İlon Maskın rəhbərlik etdiyi Hökumətin Səmərəliliyi Departamenti (DOGE) süni intellektdən istifadə edən federal dövlət qulluqçularını izləyir. Mənbələrin məlumatına görə, Maskın departamenti ABŞ prezidenti Donald Trampa sadiq olmayan işçilər axtarır.

Bundan əlavə, ABŞ prezidenti Donald Tramp Maskın DOGE-dəki işinin başa çatmaq üzrə olduğunu bildirib. Eyni zamanda o etiraf edib ki, milyarder tezliklə öz şirkətlərini idarə etməyə qayıtmalıdır.

Samir