Rusiya neftinin ixracı artıq ardıcıl ikinci həftədir ki, artır. Üstəlik, əvvəlki illərdə sanksiyalara məruz qalmış tankerlərin yarısı yenidən Rusiya limanlarından neft daşıyır. 

HİT.az xəbər verir ki, bu barədə "Bloomberg" agentliyi məlumat yayıb.

Agentliyin məlumatına görə, 27 aprelə qədər olan dörd həftə ərzində Rusiya limanlarından gündəlik neft ixracı 3,26 milyon barelə çatıb. Bu, əvvəlki həftəyə nisbətən 1% artım deməkdir.

Əsas artım Baltik və Sakit okean bölgələrindəki limanlardan olan tədarüklər hesabına baş verib. Qara dəniz və Arktikadakı axınların azalması isə bu artımı qismən kompensasiya edib. Agentlik qeyd edir ki, ABŞ prezidenti Donald Tramp hələlik Rusiya ilə bağlı əlavə sanksiyalar tətbiq etməkdən çəkinir. Bu arada, keçmiş prezident Co Bayden dövründə sanksiyalara məruz qalmış bir neçə tanker yenidən Rusiya nefti daşımağa başlayıb.

ABŞ tərəfindən 2023 və 2024-cü illərdə "qara siyahı"ya salınmış 39 gəmidən azı 18-i hazırda mütəmadi olaraq Rusiya limanlarından neft daşımaları həyata keçirir. Bəzi digər gəmilər isə İran və Venesuela ilə ticarətə keçiblər.

27 aprelə qədər olan bir həftə ərzində tankerlər tərəfindən 23,72 milyon barel Rusiya nefti yüklənib. Bu rəqəm, əvvəlki həftədə 31 gəmi ilə daşınmış 23,45 milyon bareldən bir qədər yüksəkdir.

Agentliyin hesablamalarına görə, 20 aprelə qədər olan dörd həftəlik dövrdə Rusiya neftindən əldə edilən gəlir orta hesabla 1,3 milyard dollar səviyyəsində qalaraq dəyişməyib. Bu, artan ixrac həcminin neft qiymətlərindəki azalma ilə balanslaşdırıldığını göstərir.

Bununla belə, ixracın ümumi dəyəri ikinci həftədir ki, artır. 27 aprelə qədər olan dövrdə bu məbləğ təqribən 50 milyon dollar və ya 4% artaraq 1,33 milyard dollara çatıb. Bu artım həm tədarük həcmlərində, həm də orta həftəlik qiymətlərdəki yüksəlişi əks etdirir.

Əlavə olaraq, "Bloomberg" yazır ki, Urals markalı Rusiya neftinin Baltik limanlarında ixrac qiyməti bir barel üçün təxminən 0,90 dollar, Qara dənizdə isə 0,80 dollar bahalaşıb. Sakit okean regionunun əsas ixrac növü olan ESPO markası isə 1,50 dollar artıb. Hindistana tədarüklərin qiyməti isə orta hesabla 0,40 dollar yüksəlib.

27 aprelə qədər olan dörd həftəlik dövrdə, Asiyada, o cümlədən təyinat məntəqəsi göstərilməyən ölkələrə Rusiya nefti tədarükləri gündəlik 2,95 milyon barelə qədər artıb.

Samir