Avropadakı bəzi büdcəli aviaşirkətlərdə sərnişinlərin ayaqüstə səyahət etməsi mümkün ola bilər. 

HİT.az xəbər verir ki, bu barədə "Daily Mail" məlumat verib.

İtalyan "Aviointeriors" şirkəti təyyarələrdə yeni növ oturacaq konsepti üzərində işləyir. "Skyrider 2.0" adlanan bu model ilk dəfə 2018-ci ildə Hamburqda keçirilən sərgidə təqdim olunub. Yeni oturacaq dizaynı sərnişinlərə tam oturmadan, yalnız arxaya söykənərək “yarıoturaq” vəziyyətdə səyahət etməyə imkan verir.

Şirkətin məlumatına görə, bu oturacaqlar adi təyyarə kreslolarından iki dəfə yüngüldür və onların tətbiqi təyyarənin sərnişin tutumunu 20 faiz artırır. Eyni zamanda, təyyarənin ümumi çəkisi azalır və sərnişin sayı çoxaldığı üçün bilet qiymətləri xeyli ucuzlaşa bilər.

Yeni oturacaqlar velosiped oturacağına bənzər formada dizayn olunub – kompakt, yumşaq və “yarıoturaq” vəziyyətdə istifadə üçün nəzərdə tutulub. Konsepsiya əsasən qısa məsafəli uçuşlar üçün nəzərdə tutulub, burada rahatlıqdan bir qədər güzəştə gedərək daha aşağı qiymət təklif edilə bilər.

Hələlik bu tip oturacaqları tətbiq etməyə dair heç bir aviaşirkət rəsmi açıqlama verməyib, lakin böyük aşağıbüdcəli daşıyıcıların artıq maraq göstərdiyi bildirilir. Ryanair rəhbəri Maykl O’Liri hələ 2012-ci ildə belə bir ideyanı dəstəklədiyini bildirmiş, “Boeing 737–800” model təyyarədə əlavə 10 sıra sərnişin yerləşdirməyin mümkün ola biləcəyini və belə yerlər üçün biletlərin cəmi 1–5 funt sterlinqə satıla biləcəyini qeyd etmişdi.

"Aviointeriors"un proqnozlarına görə, bu tip oturacaqlar 2026-cı ildən kommersiya reyslərində istifadə oluna bilər – lakin bunun üçün hava nəqliyyatı qurumlarından bütün lazımi sertifikat və təsdiqlərin alınması şərtdir.

Samir