Britaniyanın ən qədim yolu hesab edilən “Ridgeway” milli cığırı artıq 5000 ildən çoxdur ki, insan ayağı görən bir marşrutdur. Bu yol ümumilikdə 140 kilometr uzunluğunda olub, UNESCO-nun Ümumdünya İrsi Siyahısına daxil edilmiş “Avebury” bölgəsindən (Wiltshire qraflığında) başlayaraq “İvingho mayakı” yaxınlığında başa çatır. Sözügedən mayak “Chiltern” təpələrinə açılan mənzərələri ilə tanınır. 

HİT.az xəbər verir ki, bu barədə “Mirror” nəşri yazır.

Bu cığır vasitəsilə yalnız tarix içində bir səyahət deyil, həm də unikal abidələr – neolit dövrünə aid məzarlar və folklorla bağlı olan “Uffington ağ atı” kimi tanınan dağ təsviri ilə tanış olmaq mümkündür.

“Ən azı 5000 il, bəlkə də daha uzun müddət ərzində bu yol ilə insanlar – sürücülər, tacirlər və işğalçılar – piyada və ya atla hərəkət ediblər. Bu yol bir vaxtlar Dorsetin sahilindən Norfolkda yerləşən “The Wash” adlanan əraziyə qədər uzanan 250 millik (təxminən 400 km) tarixdən əvvəlki marşrutun bir hissəsi olub. O, səyyahlar üçün aşağıda yerləşən nəm kənd yollarına nisbətən daha quru və meşəsiz olan yüksəkliklərdən keçərək əlverişli keçid təmin edib”, deyə “National Trails” rəsmi saytında bildirilir.

“Express”in məlumatına görə, hazırda bu cığır piyada turistlər, qaçışçılar, velosipedçilər və at minənlər üçün sevilən bir marşruta çevrilib. Təbii gözəllikləri və dərin tarixi kökləri ilə diqqət çəkir.

“Min illər öncə yaşamış əcdadlarımızın izləri ilə addımlamaq fikri valehedicidir”, deyə "TripAdvisor" platformasında səyyahlardan biri belə yazıb.

Başqa bir səyyah isə bunları qeyd edib: "Cığır Overtown təpəsindən İvingho mayakına qədər uzanır, amma əlbəttə ki, bütün marşrutu getmək məcburi deyil! Biz Chiltern bölgəsindəki hissəsini keçdik və həftənin ortasında orada demək olar ki, sükut hökm sürürdü. Marşrut yaxşı nişanlanıb və təpəlik kənd mənzərələrinə gözəl görüntülər açılır".

Samir