Ukrayna prezidenti Volodımır Zelenski rus tərəfinin İstanbulda gedən diplomatik prosesi uzatmağa çalışacağına inanır. 

HİT.az-ın verdiyi məlumata görə, o, bu fikirləri 20 iyun tarixində jurnalistlərlə görüşdə ifadə edib.

Xüsusilə, prezidentdən 22 iyundan sonra İstanbula səfərin mümkünlüyü barədə soruşulub. Zelenski vurğulayıb: "Ruslar İstanbul prosesini mütləq uzadacaq – sanksiyaların təxirə salınması və s. məqsədlər üçün. Biz isə həqiqətən çətin seçim qarşısında qalacağıq: belə davam etmək ya da başqa istiqamət tutmaq".

O, həmçinin rusların əvvəl İstanbulda mübadilələr keçirilməsinə niyə razılaşdığını izah edib. Prezidentin fikrincə, onlar üçün Amerikanı Ukraynadan ayırmaq, yardımı dayandırmaq vacibdir və bunun üçün diplomatiklik nümayiş etdirmək lazımdır.

Zelenski bildirib: "Diplomatiklik özünü Amerikasız şəkildə ukraynalı tərəflə görüş imkanında göstərir. Görüşü müsbət nəticələndirməyin yolu nədir? Mübadilələr. Bunun üçün kifayət qədər mübadilə olmalıdır. Yəni, məsələn, daha bir neçə görüş keçirilsə, onlar ABŞ-ya diplomatik prosesin getdiyini nümayiş etdirəcək və sanksiyalar təxirə salınacaq. Mübadilələr davam etdiyi müddətcə liderlər səviyyəsində görüşlər də təxirə düşəcək. Çünki bu onlar üçün açıq-aydın sərfəli deyil".

Zelenski ayrıca, İstanbulda oğurlanmış uşaqlar haqqında danışıldığını, çünki bunun Ukrayna üçün ağrılı bir mövzu olduğunu bildirib:

"Onlar mübadilə üçün siyahılara bizim hərbi əsirlərimizlə yanaşı uşaqları da əlavə etməyə çalışdılar. Uşaqları bizə verib, öz hərbçilərini geri almağa çalışdılar. Biz buna getmədik. Onlar dedilər ki, deməli biz uşaqları qaytarmaq istəmirik. İstanbulda növbəti görüşdə biz ilk uşaq siyahısını təqdim etdik. Çünki bu bizim digər tərəfdaşlara verdiyimiz siyahılardan biri idi. Onlar onu götürdülər. Onlar bizdə olan uşaqlar barədə sual qaldırmadılar, çünki onlar yoxdur. Bu sadəcə bir cür lovğalıqdır. Mənə bu barədə heç nə məlum deyil. Bundan sonra onlar uşaqlar mövzusuna qayıtmadılar".

Samir