Rusların yeni hücum istiqamətləri açması nəticəsində sayca az olan Ukrayna qüvvələri üçün müharibə "dəlik vurmaq oyunu"na çevrilib.

HİT.az xəbər verir ki, bu barədə "The Wall Street Journal" yazıb.

Rus qoşunları Ukraynanın şimal-şərqində yeni hədəf olan Sumı şəhərindən cəmi 19 km aralıdadır. Kreml getdikcə daha çox cəbhə bölgəsində insan gücü üstünlüyündən istifadə edir.

Rusiya bu ilin əvvəlində Ukrayna qüvvələrini Kursk vilayətindən demək olar ki, tamamilə çıxartdıqdan sonra, indi əks istiqamətdə - Sumıya doğru hərəkət edir. Bölgədə döyüşən hərbi mənbələrə görə, buradakı rus qüvvələri Ukrayna qarnizonundan 3 dəfə çoxdur (50 000 nəfər).

Ukrayna Silahlı Qüvvələri Baş Komandanı Aleksandr Sirski deyib: "Onların əsas strategiyası say üstünlüyü ilə bizi tükətməkdir".

Son bir ildə cəbhə xətti 160 km-dən çox uzayaraq şimal-şərqdən cənuba qədər 1200 km-dən artıq əhatə edir. Ruslar bütün xətt boyu zəif nöqtələr axtarır, tapdıqda isə (keçən ay Sumıda olduğu kimi) güclü zərbə endirirlər. Bu, Ukraynanı seçmə birləşmələri boşluqları bağlamaq üçün sürətlə göndərməyə məcbur edir.

Bu ayın əvvəlində Ukrayna vəziyyəti sabitləşdirmək üçün Hərbi Kəşfiyyat İdarəsinin (GUR) xüsusi təyinatlılarını göndərib. O vaxtdan bəri rusların Sumıda irəliləməsi dayandırılıb və Ukrayna bəzi əraziləri geri alıb.

GUR-un seçmə "Timur" bölməsinin komandiri deyib: "İndi öz hücumlarımızı təşkil etmək və düşməni geri oturtmaq üsulları axtarırıq".

Cəbhənin demək olar hər yerində sayca üstün olan düşmənlə üz-üzə gələn Ukrayna qüvvələri üçün bu asan deyil.

"Kappa" ləqəbli döyüşçü deyib: "Onların sayı böyük problemdir, amma bizi darmadağın etmək üçün kifayət deyil. Düşmən bütün regionda gündə 300-400 nəfər itirir. Amma bu itkilərə dözə bilirlər... Ehtiyatları dəfələrlə doldururlar".

Ukraynanın rus Kurskundakı ərazini 6 ay saxladığı dövrdə, döyüşçülər sərhədin Ukrayna tərəfində möhkəm müdafiə xətti hazırlanacağını düşünürdülər. Əvəzinə, Kurskdan xaotik və itkili geri çəkilmədən sonra onlar pulsuz uçuşlu dronlardan qorunmayan köhnə xəndəklərlə üzləşiblər.

Hərbçilər həm də rusların irəlilədiyi ərazilərin minalanmadığından şikayət edirlər.

Kurskda və indi Sumıda döyüşən piyada komandiri Kirill deyib: "Sanki tank kolonnaları üçün hazırlaşırdılar, gündə onlarla dron hücumunun olduğu döyüş meydanı üçün yox".

Samir