ABŞ-ın Avropa NATO müttəfiqləri qitədə Amerika qoşunlarının mövcudluğunun mümkün azaldılmasına hazırlaşır. Əsas problem odur ki, ABŞ prezidenti Donald Trampın administrasiyası Alyansla bağlı planları barədə dəqiq təfərrüatlar vermir. 

HİT.az xəbər verir ki, bu barədə Avropa rəsmilərinə istinadən "Euractiv" məlumat yayıb.

Qeyd olunur ki, bir çox avropalı NATO müttəfiqləri Trampın Avropada cəmləşmiş Amerika hərbçilərinin sayını azaldacağına əmindir. Rəsmilərin sözlərinə görə, onlar Asiya və Yaxın Şərqə yönləndirilə bilər.

NATO-nun hərbi planlayıcıları hələ nə qədər Amerika əsgərinin çıxarıla biləcəyini, bunun nə qədər tez baş verə biləcəyini və Avropa qüvvələrinin Amerika əsgərlərini əvəz edə biləcəklərini bilmirlər.

"Məsələ Amerika qoşunlarının sayının azaldılmayacağı deyil, Alyansın mövcud müdafiə planlarını təhlükəyə atmadan bunun nə dərəcədə nizamlı həyata keçiriləcəyidir", deyə NATO rəsmilərindən biri jurnalistlərə bildirib.

Nəşr vurğulayıb ki, Amerika qoşunlarının Avropadan çıxarılmasından ən çox NATO-nun şərq cinahı qorxur. Bu, digər Alyansın üzvlərindən gücləndirmə tələblərinə səbəb ola bilər.

Bundan əlavə, nəşr hesab edir ki, ABŞ-ın qitədən çıxması ABŞ-ın Almaniya və İtaliyadakı əsas hərbi bazalarına təsir göstərə bilər. Onlar Vaşinqtonun qitədəki qabaqcıl hərbi əməliyyatlarına dəstək üçün əsasdır.

Nəşr xatırladıb ki, Alyansın sammiti ərəfəsində ABŞ-ın NATO-dakı səfiri Metyu Uitaker Pentaqonun ABŞ qoşunlarının Avropada yerləşdirilməsi ilə bağlı qiymətləndirməsinin yayın sonu və ya payızın əvvəlində başa çatacağını bildirib. Onun sözlərinə görə, istənilən dəyişiklik müttəfiqlərlə sıx koordinasiya şəraitində baş verəcək.

Samir