İtaliyanın antiinhisar orqanı (AGCM) Avropa Komissiyasına aviaşirkətlərin, xüsusilə Siciliya və Sardiniyaya xidmət göstərən marşrutlarda istifadə etdiyi qiymət alqoritmlərinin şəffaflığının artırılması tələbi ilə müraciət edib.

HİT.az bu barədə "Euractiv"ə istinadən xəbər verir.

Qeyd olunur ki, bu addım bu ilin əvvəlində qiymətlərin qeyri-şəffaf olması ilə bağlı narahatlığını ifadə edən AGCM tərəfindən aparılan araşdırmanın nəticəsidir.

Aviaşirkətlərdən cavablar aldıqdan sonra AGCM Komissiyanı tariflərin şəffaflığını artırmaq və rəqabəti gücləndirmək üçün Aİ səviyyəsində fəaliyyətləri əlaqələndirməyə çağırır.

"Biletlərin qiymətinin qalxması İtaliyanın digər bölgələrində yaşayan siciliyalıların və sardiniyalıların hərəkət imkanlarını məhdudlaşdırır və onların bir çoxu yüksək xərclərə görə evlərinə getməkdən imtina edir. Bu tendensiya adaların turizm iqtisadiyyatına da ziyan vurur", - məlumatda deyilir.

İtaliyanın antiinhisar orqanı iddia edir ki, dinamik qiymət alqoritmləri - istehlakçıların davranışına əsasən gediş haqqını tənzimləyən sistemlər - baqaj və ya oturacaq seçimi kimi xidmətlər üçün əlavə ödənişlərlə birləşərək, sərnişinlərin təklifləri müqayisə etməsini praktiki olaraq qeyri-mümkün edir.

Bütün səyahətçilərin demək olar ki, yarısının istifadə etdiyi bu əlavə ödənişlər biletlərin son qiymətini elan edilən əsas tariflə müqayisədə 400% artıra bilər.

Samir