"Ukrayna Hərbi-Sənaye Kompleksi (HSK) hazırda istehsal ediləndən daha çox silah istehsal edə bilər".

HİT.az xəbər verir ki, bunu "Kanal 24"ün efirində Ukrayna Silahlı Qüvvələrinin Quru Qoşunları Ehtiyatçılar Şurasının sədri İvan Timoçko bildirib.

"Müxtəlif qiymətləndirmələrə görə, Ukrayna Ordusu hazırda silahların 40%-dən 60%-dək öz istehsalımız olan hissəsini alır. Lakin çox bahalı texnologiyalar var, məsələn "Patriot" kimi - hazırda onun istifadəsi tələb olunur. Öz analoji komplekslərimizi yaratmaq üçün böyük məbləğdə investisiya qoymalıyıq. Bu həm vaxt, həm də texnologiya baxımından çox bahalıdır. Bu vəsaitlər isə artıq indi qoyulmalıdır", deyə İvan Timoçko bildirib.

Eyni zamanda o, vurğulayıb ki, müttəfiqlərdən olan kömək hazırda ən zəruri olan silah növlərini istehsal etməyə imkan verir. Lakin gələcəkdə Ukrayna tərəfdaşlarla birlikdə daha mürəkkəb silah nümunələri istehsal edəcək müəssisələr yarada bilər.

Timoçko əlavə edib: "Xüsusi silah nomenklaturasından, xüsusən də tək ölkə istehsalçısından (yenə "Patriot"dan danışır) asılı olmamaq və ABŞ-ın silah tədarükünü dayandırdığı vaxtkı kimi riskli vəziyyətlərə düşməmək üçün gələcək perspektivdə başa düşməliyik ki, təhlükəsizliyimizə özümüz etibar etməliyik. Ya da bu kompleks qarşılıqlı əlaqə və dəstək şəklində olmalıdır".

Bundan əvvəl Ukraynanın müdafiə naziri Denis Şmıqal bildirib ki, ölkənin bu il silah istehsalındakı boşluğu örtmək üçün 6 milyard dollara ehtiyacı var. Xüsusilə qeyd olunur ki, bu vəsaitlər Ukrayna müdafiə-sənaye kompleksinə bir sıra dron növləri və digər silahlar istehsal etməyə imkan verəcək.

Şmıqal həmçinin bir gün əvvəl bildirib ki, gələn il Ukraynanın müdafiəyə ən azı 120 milyard dollar lazımdır. Bundan əlavə, o qeyd edib ki, hazırda Ukrayna silahlarının həcmini artırmaq hədəf qoyulub: müdafiəçilərimiz üçün silahların 50%-i Ukraynada alınmalıdır. Həmçinin, Ukrayna ilə əməkdaşlıq etməyə və Ukraynada fəaliyyət göstərməyə hazır olan daha çox xarici müəssisəni cəlb etmək üzərində işlər gedir.

Samir