Özünü Belarus prezidenti elan edən Aleksandr Lukaşenko ordunu etirazları yatırmaq və cəmiyyət üzərində nəzarəti gücləndirmək üçün hazırlayır.
HİT.az xəbər verir ki, bu barədə Ukrayna Xarici Kəşfiyyat Xidməti məlumat yayıb.
"Hərbi təhlükəsizliyin və müdafiənin təmin edilməsi haqqında qanunlara dəyişikliklər edilməsi haqqında" yeni qanun layihəsi təhlükəsizliyə yanaşmaları kökündən dəyişdirir: Belarus ordusu, xüsusən də ölkə daxilindəki fəaliyyətlərlə bağlı daha geniş səlahiyyətlər alır. Əsas vurğu güc komponentinə yönəlib", deyə kəşfiyyat qeyd edib.
Qeyd olunur ki, əgər əvvəllər müdafiə siyasi, hüquqi və sosial-iqtisadi tədbirlər kompleksi kimi müəyyən edilirdisə, indi prioritet silahlı müdafiədir.
Xarici kəşfiyyatın məlumatına görə, yenilənməyə əsasən, Belarus ordusu müharibə vaxtı təkcə təcavüzü dəf etməməli, həm də milli maraqlara cavab verən şərtlərlə sülh bağlamaq üçün düşməni məğlubiyyətə uğratmalıdır.
"Sülh dövründə ordunun funksiyalarının genişləndirilməsinə xüsusi diqqət yetirilir. Hərbçilər rəsmi olaraq daxili silahlı münaqişələrin qarşısının alınmasında, "dövlətin maraqları naminə" informasiya qarşıdurmasında iştirak etməkdə, daxili böhranlara və müttəfiq ölkələrdə baş verən böhranlara cavab verməkdə, habelə sərhəd təxribatlarına qarşı mübarizədə iştirak edirlər", deyə məlumatda vurğulanıb.
Bundan əlavə, bu sənəd Belarusda hərbi vəziyyətin elan edilməsinin səbəblərinin daha geniş şərhini təqdim edir: indi bu, təkcə Belarusa deyil, həm də İttifaq dövlətinə və ya KTMT üzvü olan dövlətə hücum zamanı mümkündür.
Xəbər verdiyimiz kimi, payızda keçirilməsi planlaşdırılan “Qərb-2025” birgə strateji təlimlərinə hazırlıq və gələcək iştirak üçün Rusiya hərbi personalı və texnikasının birinci eşalonu Belarusa gəlib.
Bundan əvvəl Ukrayna Silahlı Qüvvələrinin Baş Komandanı Aleksandr Sırski bəyan etmişdi ki, 2022-ci ildə Ukraynaya müdaxilə ərəfəsində Rusiya öz qoşunlarını Belarusda yerləşdirib, ona görə də, payızda planlaşdırılan “Qərb-2025” Rusiya-Belarus təlimləri yeni zərbə qrupunun yaradılmasına çevrilə bilər.
Samir
