İtkin düşdüyü gündən bəri ümidlər azalmışdı, amma süni intellekt dövrəyə girincə hər şey dəyişib. Cəmi iki gün davam edən axtarışla illik sirr aydınlaşıb.
HİT.az xəbər verir ki, İtaliyanın sirli və çətin iqlim şəraiti ilə tanınan Monte Viso dağında tam bir il əvvəl itkin düşən alpinist Nikola İvaldonun taleyi müasir texnologiyanın gücü sayəsində cəmi iki gündə aşkar edilib.
"Huffington Post"un xəbərinə görə, 29 iyul 2024-cü ildə dağda izini itirən 66 yaşlı İvaldonu tapmaq üçün ənənəvi axtarış-xilasetmə üsulları kifayət etməyib. Lakin İtaliyadakı xilasetmə dəstələri bu kritik vəziyyətdə süni intellekt və dron texnologiyalarını dövrəyə salaraq axtarış əməliyyatına tamamilə yeni bir ölçü qatıb.
Alpinistin mobil telefonundan gələn siqnalların baz stansiyaları vasitəsilə müəyyən edilməsi ilə təhlükə altındakı zona seçilib. Daha sonra yanğınsöndürən helikopterləri və xüsusi təchiz edilmiş dronlar təxminən 183 hektarlıq böyük ərazidə tam 2.600-dən çox yüksək keyfiyyətli fotoşəkil çəkib. Ancaq belə böyük bir məlumat yığını içində axtarılanı tapmaq asan deyil.
Məhz burada dövrəyə girən süni intellekt dəstəkli proqram hər fotoşəkili piksel-piksel təhlil edərək, təbii mənzərəyə uyğun gəlməyən detalları fərqləndirib. İki gün davam edən təhlil nəticəsində üç potensial hədəf müəyyən edilib və bu hədəflərdən birində, çətin təbiət şəraitində parlaq qırmızı kask diqqət çəkib.
Süni intellektin işarə etdiyi nöqtə Monte Viso dağının 3.150 metr hündürlükdəki şimal üzüdür. Xilasetmə dəstələri çətin relyef şəraitinə baxmayaraq əraziyə çatanda, itkin alpinistin cansız bədənini tapıb.
Mütəxəssislər bu uğurun ənənəvi üsullarla mümkün olmaya biləcəyini vurğulayarkən, İtaliyada bir il davam edən qeyri-müəyyənliyə son qoyan bu əməliyyat alpinizm və axtarış-xilasetmə sahəsində texnologiyanın təqdim etdiyi inqilabi imkanların çarpıcı nümunəsi kimi qeydə alınıb.
Bu hadisə süni intellektin və pilotsuz uçuş aparatlarının təkcə gündəlik həyatı deyil, həm də insan həyatını xilas etmə proseslərini nə dərəcədə dəyişdirdiyinin güclü sübutu olub.
Samir
