Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov bildirib ki, Rusiya Şimali Koreya qoşunlarının Ukraynaya qarşı müharibədə iştirakını səxavətlə maliyyələşdirir.

HİT.az GUR-un mətbuat xidmətinə istinadən xəbər verir ki, bu barədə general-leytenant “The Japan Times” qəzetinə müsahibəsində bildirib.

"Kreml bütün hərbi texnika və qoşunların pulunu ödəyir. Söhbət on milyardlarla dollardan gedir və dünyanın ən təcrid olunmuş ölkələrindən biri olan Şimali Koreyanın iqtisadiyyatı üçün bu, çox ciddi puldur", deyə hərbi kəşfiyyat rəhbəri qeyd edib.

O bildirib ki, bu tərəfdaşlıq Ukraynadakı müharibə ilə məhdudlaşmır və daha geniş geosiyasi ölçüyə malikdir: "Biz daim vurğulayırıq ki, Moskva və Pxenyan arasında əməkdaşlıq təkcə Ukrayna üçün təhlükə yaratmır".

Onun sözlərinə görə, Şimali Koreya unikal döyüş təcrübəsi qazanır, çünki dünyada yalnız bir neçə ölkə bu miqyasda müharibə apara bilib: "Hazırda dünyada demək olar ki, bütün mümkün vasitələrdən istifadə etməklə çox geniş cəbhə xəttində müasir müharibə aparmaq təcrübəsi olan cəmi üç ölkə var - bunlar Ukrayna, Rusiya və Şimali Koreyadır".

O qeyd edib ki, GUR-un məlumatına görə, yaxın gələcəkdə Şimali Koreya Rusiyaya əlavə 6000 hərbi qulluqçu, o cümlədən 50-dən 100-ə qədər texnika, M2010 (Çeonma-D) əsas döyüş tankları və BTR-80 zirehli transportyorları, guya mühəndis işləri üçün göndərməyi planlaşdırır.

"Onlardan bəziləri həqiqətən minalardan təmizlənmə və istehkam tikintisində iştirak edə bilər, amma hamısı bununla məşğul olacaqmı?" deyə GUR rəhbəri qeyd edib.

Samir