Rusiya lideri Vladimir Putin Ukrayna prezidenti Volodimir Zelenski ilə görüşsə, 3,5 ildir qeyri-legitim lider və marionet kimi tənqid etdiyi adamla üz-üzə gələcək.
HİT.az xəbər verir ki, bunu "The Wall Street Journal" yazıb.
"Zelenski ilə birbaşa danışıqlar Putinin 2022-ci ildə Ukraynaya təcavüzünə haqq qazandırmaq üçün diqqətlə hazırladığı və ruslara satdığı rəvayətlə ziddiyyət təşkil edəcək: müharibə Zelenski və ölkəsinin sadəcə piyon olduğu Qərblə daha geniş münaqişənin bir hissəsidir", deyə nəşrin şərhçiləri qeyd edirlər.
Məqalədə deyilir ki, ABŞ prezidenti Donald Trampın görüş çağırışı Putini çətin vəziyyətə salır. Rusiya lideri bundan imtina edərsə, artıq onu yeni sanksiyalarla hədələyən Trampı qəzəbləndirə bilər. Lakin bu görüş onun Rusiya elitası və cəmiyyəti arasında siyasi imicinə xələl gətirə bilər.
"Putinin Zelenski ilə görüşə razılığı çətin ki, tez və ya asan olsun. O, dəfələrlə Ukrayna liderini Qərbin xidmətçisi adlandırıb və təkid edib ki, iki lider görüşməzdən əvvəl müxtəlif çətin məsələləri həll etmək lazımdır. O, həmçinin prezidentlik müddətini adi beşillik müddətdən kənara uzatdıqdan sonra Zelenskinin legitimliyini şübhə altına alıb", deyə WSJ vurğulayıb.
Eyni zamanda, nəşrin müəllifləri bildirirlər ki, belə danışıqların aparılması ilə bağlı problemlər təkcə Zelenski ilə bağlı deyil. Analitiklərin fikrincə, Putin Ukraynadakı müharibəni Rusiyanın soyuq müharibənin bitməsindən sonra hiss etdiyi şikayətləri nəzərdən keçirmək üçün daha geniş Rusiya kampaniyasının bir hissəsi kimi qiymətləndirir.
"Putin üçün bu, Qərblə daha geniş qarşıdurmadır. Ukrayna isə Rusiya və Qərb arasında döyüş meydanıdır. Putinin fikrincə, Zelenski oyunçu deyil. Ukraynalıların ümumiyyətlə vuruşması Qərbin dəstəyi ilə izah olunur", deyə Karnegi Rusiya-Avrasiya Mərkəzinin baş elmi işçisi Tatyana Stanova bildirib.
Analitiklər onu da iddia edirlər ki, sonda Putin böyük ehtimalla görüş ideyasından qəti şəkildə imtina etmədən yan keçəcək, çünki bu, onun əvvəllər atəşkəs çağırışlarına cavab olaraq istifadə etdiyi strategiyadır.
Samir
