Avstraliyanın Yeni Cənubi Uels ştatının sahilində gözlərindən qan axan tısbağalar da daxil olmaqla ən azı 32 tısbağa tapılıb və bu hadisə ətraf mühit fəallarını təcili təhqiqata sövq edib. 

HİT.az xəbər verir ki, bunu "The Independent" qəzeti yazır.

Yeni Cənubi Uels Milli Parklar və Vəhşi Təbiət Xidməti (NPWS) bildirib ki, son həftələrdə Port-Stivens bələdiyyəsi ərazisində baş verən bütün tısbağa ölümləri ilə bağlı təhqiqat aparır.

Qeyd edilib ki, "Sea Shelter" dəniz xilasetmə qrupu son bir ay ərzində Port-Stivensdə, o cümlədən yalnız son bir həftə ərzində yeddi yaşıl tısbağanın ölümü hallarını qeydə alıb. Yaşıl tısbağalar Avstraliyanın təbiəti mühafizə qanunvericiliyinə görə məhdudlaşmış növlər siyahısına daxildir.

Heyvanlar, o cümlədən Şol-Bey, Nelson-Bey və Korlet də daxil olmaqla bir neçə məşhur çimərlikdə aşkar ediliblər. Baxmayaraq ki, ölüm halları turist çimərlikləri ətrafında cəmlənib, vəhşi təbiət mütəxəssisləri bunun sadəcə olaraq onların sıx məskunlaşılmış ərazilərdə daha çox görünmə ehtimalının nəticəsi ola biləcəyini güman ediblər.

Təhqiqatda NPWS, Əsas Sənaye Departamenti və Taronqa Zooparkının Avstraliya Vəhşi Heyvanlar Sağlamlığı Reyestri də daxil olmaqla bir neçə agentlik iştirak edir.

"Nümunələr təhlil üçün götürülür və səbəbləri müəyyən etmək məqsədilə təhqiqat aparılır", deyə Yeni Cənubi Uels Milli Parklar və Vəhşi Təbiət Xidməti bəyanatında qeyd edib.

Əhəmiyyətlidir ki, idarə xəstə və ya yaralanmış dəniz tısbağaları barədə Milli Parklar və Vəhşi Təbiət Xidmətinə (NPWS) və ya "Irukandji Shark and Ray Encounters" təşkilatına məlumat verilməsini tövsiyə edir. "Sea Shelter"in həmtəsisçisi Lia Pereyra bildirib:

"Bu, şübhəsiz ki, çox, çox narahatedicidir. Tısbağalarla işləmək tariximdə mən heç vaxt Port-Stivensdə belə bir vəziyyət görməmişəm".

"Sea Shelter"in digər təsisçisi Ryan Pereyra isə ərazidə son daşqınlardan sonra xəstə və ya ölü tısbağaların sayında artım müşahidə etdiklərini danışıb. O əlavə edib ki, tısbağaların ölüm səbəbini təsdiqləmək üçün hələlik çoxlu ehtimallar var.

Qeyd edilib ki, ətraf mühit müdafiəçiləri gözlər ətrafında qanaxmanı qeyri-adi simptom adlandırıblar.

"Diqqətlə aparılan çoxşaxəli təhqiqat davam edir və hadisəyə səbəb olan amilləri müəyyən etmək bir neçə həftə çəkə bilər", deyə Taronqa Zooparkının reyestrində qeyd olunub.

Səlahiyyətlilər bildiriblər ki, iki ölü tısbağadan iki nümunə götürülüb və həmçinin Port-Stivensdən olan daha 15 tısbağanın nümunələri diaqnostik tədqiqatdan keçirilir.

Samir